புதுடில்லி: இந்தியா - அமெரிக்கா இடையிலான வர்த்தக ஒப்பந்தம் குறித்த கூட்டறிக்கை இந்த வாரத்தில் வெளியாக வாய்ப்பு உள்ளதாக மத்திய அரசு வட்டாரங்கள் தெரிவித்துள்ளன.


நீண்ட இழுபறிக்கு பிறகு இந்தியா - அமெரிக்கா இடையிலான வர்த்தக ஒப்பந்தம் இறுதியானது. அமெரிக்க அதிபர் டிரம்ப் - பிரதமர் மோடி ஆகியோர் பேசியதைத் தொடர்ந்து இந்த அறிவிப்பு வெளியானது. மேலும், இந்திய பொருட்கள் மீதான வரி விதிப்பை 25 சதவீதத்தில் இருந்து 18 சதவீதமாக குறைக்கப்படுவதாக டிரம்ப் அறிவித்துள்ளார். அமெரிக்காவிடம் இருந்து 500 பில்லியன் டாலர் அளவுக்கு எரிசக்தி,தொழில்நுட்பம், விவசாயம் மற்றும் பாதுகாப்பு சார்ந்த பொருட்களை வாங்கவும் இந்தியா ஒப்புக் கொண்டுள்ளது.



இந்த ஒப்பந்தம் காரணமாக இந்தியாவின் ஏற்றுமதி அதிகரிப்பதுடன், முதலீடு ஈர்க்கப்பட்டு, அமெரிக்கா உடனான பொருளாதார உறவு வலுப்படும் என எதிர்பார்க்கப்படுகிறது.


போட்டி நாடுகள் பெற்ற ஒப்பந்தத்தை விட, இந்தியா பெற்ற ஒப்பந்தம் சிறந்தது என மத்திய அமைச்சர் பியூஷ் கோயல் கூறியுள்ளார்.


இந்நிலையில் இந்தியா அமெரிக்கா இடையிலான வர்த்தக ஒப்பந்தம் குறித்த கூட்டறிக்கை அடுத்த வாரம் வெளியாகும் என மத்திய அரசு வட்டாரங்கள் தெரிவித்துள்ளன.

ஒப்பந்தம் தொடர்பாக அமைக்கப்பட்டுள்ள குழுக்கள் ஒப்பந்தத்தை இறுதி செய்யும் பணிகளில் உள்ளதாகவும், அது குறித்த கூட்டறிக்கை இந்த வாரத்தில் வெளியாக வாய்ப்பு உள்ளதாகவும் அந்த வட்டாரங்கள் தெரிவித்தன.