திருப்புவனம்: மதுரை - பரமக்குடி நான்கு வழிச்சாலையில் சென்டர் மீடியன் மற்றும் பக்கவாட்டில் உள்ள செடிகளுக்கு தண்ணீர் ஊற்றப்படாததால் கருகி வருகின்றன.

மதுரையில் இருந்து பரமக்குடி வரை நான்கு வழிச்சாலையும் அதன்பின் ராமநாதபுரம் கிழக்கு கடற்கரை சாலை வரை இருவழிச்சாலையும் அமைக்கப்பட்டு போக்குவரத்து நடந்து வருகிறது. சாலையின் நடுவே சென்டர் மீடியன் அமைக்கப்பட்டு அதில் அரளிச் செடிகள் வளர்க்கப்பட்டு வருகின்றன. விபத்தின் போது போக்குவரத்தை சீரமைப்பது. பழுதான இடங்களை சரி செய்வது சென்டர் மீடியன் செடிகளுக்கு தண்ணீர் பாய்ச்சி பராமரிப்பது போன்ற பணிகளை தனியார் நிறுவனம் மேற்கொண்டு வருகின்றனர்.

கடந்த 20 நாட்களுக்கும் மேலாக சாலையின் இருபுறம் மற்றும் சென்டர் மீடியனில் உள்ள அரளிச் செடிகளுக்கு தண்ணீர் பாய்ச்சாததால் கருகி வருகின்றன. ஏப்ரலில் வெயிலின் தாக்கம் அதிகரிப்பது வழக்கம், இந்தாண்டு பிப்ரவரியிலேயே வெயிலின் தாக்கம் அதிகரித்த வண்ணம் உள்ளது. மேலும் சென்டர் மீடியனில் புற்கள் அதிகம் வளர்ந்து வெயிலின் தாக்கத்தால் காய்ந்து உள்ளது.

தீ விபத்து ஏற்பட்டால் அரளிச் செடிகளும் எரிய வாய்ப்புள்ளது.எனவே செடிகளுக்கு தண்ணீர் ஊற்றுவதை முறையாக கண்காணிக்க வேண்டும்.