பெலகாவி: சிறுமியை பாலியல் பலாத்காரம் செய்தவருக்கு, 30 ஆண்டுகள் சிறை தண்டனை விதித்து பெலகாவி நீதிமன்றம் தீர்ப்பு அளித்துள்ளது.

பெலகாவி மாவட்டம் கசாயிகல்லியில் வசிப்பவர் இம்ரான் சவுத்ரி, 29. இவர் அதே பகுதியில் வசிக்கும், 16 வயது சிறுமியை காதலிப்பதாக நாடகமாடி, வலையில் விழ வைத்தார். சிறுமியின் விருப்பத்துக்கு மாறாக, பல முறை அவரை பாலியல் பலாத்காரம் செய்தார். இந்த விபரம், சிறுமி கர்ப்பமடைந்த பின்னரே, அவரது தாய்க்கு தெரியவந்தது. உடனடியாக போலீஸ் நிலையத்தில் புகார் அளித்தார்.

இதற்கிடையில், சிறுமிக்கு ஆண் குழந்தை பிறந்தது. நடவடிக்கை எடுத்த போலீசார், இம்ரான் சவுத்ரியை கைது செய்தனர். விசாரணையை முடித்து, பெலகாவி மாவட்ட போக்சோ சிறப்பு நீதிமன்றத்தில் குற்றப்பத்திரிகை தாக்கல் செய்தனர்.

நீதிமன்ற விசாரணையில், வாத, பிரதிவாதங்களை கேட்டறிந்த நீதிபதி புஷ்பலதா, ''குற்றவாளி செய்த குற்றம் மிகவும் கொடுமையானது,'' என கருத்து தெரிவித்து, இம்ரான் சவுத்ரிக்கு, 30 ஆண்டுகள் சிறை தண்டனையும், 1 லட்சம் ரூபாய் அபராதமும் விதித்து நேற்று தீர்ப்பளித்தார். அபராதம் செலுத்த தவறினால், கூடுதலாக இரண்டு ஆண்டுகள் சிறை தண்டனை அனுபவிக்க நேரிடும் என்று தெரிவித்தார்.

பாதிக்கப்பட்ட சிறுமிக்கு, 5 லட்சம் ரூபாய் நிவாரணம் வழங்கும்படி நீதிபதி உத்தரவிட்டுள்ளார்.