சென்னை: 'மீனவர் பிரச்னைக்கு தீர்வு காண அமைக்கப்பட்டுள்ள இந்தியா - இலங்கை கூட்டு பணிக் குழுவை உரிய முறையில் புனரமைத்து, அதன் கூட்டத்தை விரைவாக கூட்ட வேண்டும்' என, முதல்வர் விஜய் கூறியுள்ளார்.

மத்திய வெளியுறவு துறை அமைச்சர் ஜெய்சங்கருக்கு, அவர் அனுப்பியுள்ள கடிதம்: ராமேஸ்வரத்தை சேர்ந்த ஒன்பது மீனவர்கள் இலங்கை கடற்படையினரால், 3ம் தேதி கைது செய்யப்பட்டதுடன், அவர்களின் விசை படகுகளும் பறிமுதல் செய்யப்பட்டுள்ளன.

ராமநாதபுரம் மற்றும் அதை ஒட்டியுள்ள கடலோர மாவட்டங்களை சேர்ந்த மீனவர்கள், பாரம்பரியமாகவே பாக் ஜலசந்தி பகுதியில், மீன்பிடி தொழில் செய்து வருகின்றனர். அவர்களின் முதன்மையான வாழ்வாதாரமாக, மீன்படி படகுகள் விளங்குகின்றன. அவை பறிமுதல் செய்யப்படுவதால், மீனவர்களுக்கு பொருளாதார நெருக்கடி ஏற்படுகிறது. மீனவர்கள் பிரச்னைக்கு தீர்வு காண அமைக்கப்பட்டுள்ள இந்தியா - இலங்கை கூட்டு பணிக்குழுவை உரிய முறையில் புனரமைத்து, அதன் கூட்டத்தை விரைவாக கூட்ட வேண்டும்.

இரு நாட்டு மீனவர்களின் பிரச்னைகளுக்கு ஆக்கபூர்வமான தீர்வு காண வேண்டும். இலங்கையில் சிறையில் உள்ள 20 மீனவர்களையும், பறிமுதல் செய்த, 270 படகுகளை மீட்கவும் தேவையான நடவடிக்கைகளை மேற்கொள்ள வேண்டும். இவ்வாறு கடிதத்தில் கூறியுள்ளார்.