கரூர் ஜவஹர் பஜாரில், பண்டிகை முடியும் வரை சரக்கு வாகனங்கள் வந்து செல்ல தடை விதிக்க வேண்டும் என, பொதுமக்கள் கோரிக்கை விடுத்துள்ளனர்.

கரூர் ஜவஹர் பஜாரில் ஜவுளி கடைகள், நகை கடைகள் மற்றும் வர்த்தக நிறுவனங்கள் உள்ளன. தற்போது, பண்டிகை தொடங்கிய நிலையில் ஆயிரக்கணக்கானோர் புத்தாடை மற்றும் பல்வேறு பொருட்களை வாங்க வருவர். இதனால், ஜவஹர் பஜாரில் போக்குவரத்து நெரிசல் ஏற்பட வாய்ப்புள்ளது. இந்நிலையில், லாரி உள்பட சரக்கு வாகனங்கள் வந்து செல்கின்றன. இதனால், கரூர் ஜவஹர் பஜார் பகுதியில், கடும் போக்குவரத்து நெரிசல் ஏற்படுகிறது.

எனவே, சரக்கு வாகனங்கள் குறிப்பிட்ட நேரத்தை தவிர மற்ற நேரத்தில் செல்லக்கூடாது என போக்குவரத்து போலீசார் தடை விதித்துள்ளனர். அந்த உத்தரவு காற்றில் பறக்க விடப்பட்டு வாகனங்கள் சென்று வருகின்றன. பண்டிகை முடியும் வரை, சரக்கு வானங்கள் வந்து செல்வதை தடுக்க, போக்குவரத்து போலீசார் நடவடிக்கை எடுக்க வேண்டும் என, பொதுமக்கள் எதிர்பார்க்கின்றனர்.