சென்னை: பாகிஸ்தான் பயங்கரவாதி ஷாசாத் பட்டி கூட்டாளிகள், திருப்பூர், ஈரோடு மாவட்டங்களில் பதுங்கி இருப்பதாக கிடைத்த தகவவலையடுத்து, அந்த மாவட்டங்களில், என்.ஐ.ஏ., எனும் தேசிய புலனாய்வு முகமை அதிகாரிகள் தேடுதல் வேட்டையில் ஈடுபட்டுள்ளனர்.

போதைப் பொருள் கடத்தலில் ஈடுபட்டு வந்த, பாகிஸ்தானைச் சேர்ந்த ஷாசாத் பட்டி, பயங்கரவாதியாக உருவெடுத்துள்ளார். இவர், 'ஷாசாத் பட்டி நெட்ஒர்க்' என்பதன் சுருக்கமாக, எஸ்.பி.என்., என்ற அமைப்பையும் ஏற்படுத்தி உள்ளார்.

இவரது தலைமையில் செயல்படும் கும்பல், நம் நாட்டு இளைஞர்களை மூளைச்சலவை செய்து, பயங்கரவாத செயலுக்கு தயார் செய்வதாக கூறப்படுகிறது. இது, என்.ஐ.ஏ., எனும் தேசிய புலனாய்வு முகமை அதிகாரிகளுக்கு தெரியவந்துள்ளது.

அவர்கள் விசாரணை நடத்தி, கடந்த, செப்., 16ம் தேதி, தஞ்சாவூரில் பதுங்கி இருந்த எஸ்.பி.என்., அமைப்பைச் சேர்ந்த, உ.பி., மாநிலத்தைச் சேர்ந்த மக்சூத் அலி, 21 என்பவரை, சட்டவிரோத செயல்கள் தடுப்பு சட்டத்தின் கீழ் கைது செய்தனர்.

இதையடுத்து, தஞ்சாவூரில் யாசர் அப்துல், 45, என்பவர் உட்பட ஆறு பேர் கைது செய்யப்பட்டனர். இவர்கள் அளித்த தகவலின் அடிப்படையில், திருப்பூர், ஈரோடு மாவட்டங்களில் பதுங்கியுள்ள கூட்டாளிகளை தேடும் பணியில், என்.ஐ.ஏ., அதிகாரிகள் ஈடுபட்டுள்ளனர்.

அவர்கள் கூறியதாவது: தமிழகத்தில், எஸ்.பி.என்., அமைப்பை சேர்ந்தவர்கள், வழிபாட்டு தலங்கள் மற்றும் பாதுகாப்பு துறை அலுவலங்களை குறி வைத்து, சதிச் செயல்களை நடத்த திட்டமிடட்டு வருகின்றனர். முக்கியமாக, காஸ் சிலிண்டர்களை, காரில் ஏற்றிச் சென்று காவல் நிலையங்கள் மீது மோதி தாக்குதல் நடத்துவதற்கு ஆயத்தமாகி வருகின்றனர். ஏற்கனவே சிக்கிய நபர்கள் அளித்த தகவல்களின் அடிப்படையில், அவர்களின் கூட்டாளிகளை தேடும் பணியில் ஈடுபட்டுள்ளோம். இவ்வாறு அவர்கள் கூறினர்.