சென்னை: கோவில்களில் பக்தர்கள் இனி தங்கள் மொபைல் போன்களை சுவிட்ச் ஆப் செய்து எடுத்துச் செல்லலாம், தடை இல்லை என்று ஹிந்து சமய அறநிலையத்துறை கட்டுப்பாடுகளுடன் அனுமதி அளித்துள்ளது.

2026ம் ஆண்டு செப்.1ம் தேதி முதல் தமிழகத்தில் உள்ள முக்கியமான 52 கோவில்களில் மொபைல்போன்களை பக்தர்கள் கொண்டு செல்ல முழுமையாக தடை விதிக்கப்பட்டது. நீண்ட வரிசையில் காத்திருக்கும் பக்தர்கள், உடனடி மற்றும் அவசர தேவைகளுக்காக யாரையும் தொடர்பு கொள்ள முடியாத சூழல்களை சந்தித்தனர்.

எனவே, இந்த தடையை நீக்க வேண்டும் என்று பக்தர்கள் மத்தியிலும், பொதுமக்கள் மத்தியிலும் கோரிக்கைகள் எழுந்து வந்தன. பக்தர்களின் தொடர் வேண்டுகோளை கருத்தில் கொண்டு, ஹிந்து சமய அறநிலையத்துறை தற்போது சில கட்டுப்பாடுகளை தளர்த்தி உள்ளது.

அதன்படி இனி கோவில்களில் பக்தர்கள் மொபைல்போன்களை கொண்டு செல்லலாம். ஆனால் கோவில்களில் இருக்கும் வரை கண்டிப்பாக அவற்றை சுவிட்ச் ஆப் செய்து கொண்டு செல்ல அனுமதி அளிக்கப்பட்டு இருக்கிறது.

கோவிலில் சிலைகள், பூஜைகளை போட்டோ, வீடியோ எடுப்பது, செல்பி மற்றும் சமூக வலைதள பதிவுகளை எடுக்க விதிக்கப்பட்ட தடை தொடர்ந்து நீடிக்கிறது. மீறுவோர் மீது கடும் நடவடிக்கை எடுக்கப்படும் என்று ஹிந்து சமய அறநிலையத்துறை எச்சரித்தும் உள்ளது.