திருப்பூர்: திருப்பூரில் ஒரு டி–-சர்ட் தயாரிக்கும் செலவில் 12 சதவீதம் மின்சார கட்டணம் தான். ஒரு நடுத்தர சாயப்பட்டறைக்கு மாதம் 8 லட்சம் ரூபாய் மின் கட்டணம் வருகிறது.

இந்த நெருக்கடியில் இருந்து தப்பிக்க திருப்பூர் கண்டுபிடித்த வழி தான் மொட்டை மாடி சூரிய மின்சாரம். கடந்த ஆண்டு மட்டும் திருப்பூர் மாவட்டத்தில் 300-க்கும் மேற்பட்ட பின்னலாடை நிறுவனங்கள் மொட்டை மாடியில் சூரிய தகடு போட்டுள்ளன.

ஆனால் இப்போது உலகம் ஒரு அதிர்ச்சி செய்தி சொல்கிறது.

2021-க்கு பிறகு ஒவ்வொரு ஆண்டும் உலகம் புதிதாக சேர்த்த பசுமை மின்சாரம் அதிகரித்து வந்தது. கடந்த ஆண்டு 692 ஜிகாவாட் சேர்ந்தது. ஆனால் இந்த ஆண்டு அது குறையும் என்று சர்வதேச புதுப்பிக்கத்தக்க எரிசக்தி நிறுவனம் எச்சரித்துள்ளது.

காரணம் என்ன தெரியுமா? மின்சாரம் தயாரிக்கிறார்கள், ஆனால் அதை கொண்டு செல்ல கம்பி இல்லை, சேமிக்க பேட்டரி இல்லை. உற்பத்திக்கும், பயன்பாட்டுக்கும் இடையே பெரிய இடைவெளி.

இதே இடைவெளி தான் திருப்பூரிலும் உள்ளது.

பகல் 12:00 மணிக்கு உங்கள் மொட்டை மாடி 100 யூனிட் மின்சாரம் தருகிறது. ஆனால் உங்கள் தொழிற்சாலையில் இரவு 8:00 மணிக்கு தான் தையல் இயந்திரங்கள் முழு வேகத்தில் ஓடுகின்றன. அந்த மின்சாரத்தை சேமிக்க முடியவில்லை என்றால், நீங்கள் மீண்டும் மின் வாரியத்தையே நம்ப வேண்டும்.

ஐரோப்பிய வாடிக்கையாளர்கள் இனி பசுமை மின்சாரத்தில் தயாரித்த ஆடைகளுக்கு மட்டும் தான் கூடுதல் விலை தருவார்கள். பசுமை சான்றிதழ் இல்லை என்றால் ஆர்டர் இல்லை என்ற நிலை வருகிறது.

உலகம் முழுவதும் புதிய பசுமை மின்சாரம் குறையும் போது, திருப்பூர் தன் மாடியில் இருந்து தொடங்கினால் தான் பிழைக்க முடியும். சூரிய தகடு மட்டும் போதாது, அதோடு சேமிப்பு பேட்டரி, ஸ்மார்ட் மீட்டர், இரவு-பகல் பயன்பாட்டை சரி செய்யும் திட்டமும் வேண்டும்.

மின் கட்டணம் ஏறும் போது, பசுமை மின்சாரம் தான் திருப்பூரின் ஒரே ஆயுதம்.