குரோம்பேட்டை, தாம்பரம் மாநகராட்சியில், கொசு தொல்லையை கட்டுப்படுத்தாத நிர்வாகத்தை கண்டித்து, குரோம்பேட்டையில், கொசு வலை போர்த்திக்கொண்டு, சமூக ஆர்வலர்கள் நுாதன போராட்டம் நடத்தினர்.

தாம்பரம் மாநகராட்சி பகுதிகளில், கொசு தொல்லை நாளுக்கு நாள் அதிகரித்த வண்ணம் உள்ளது. அவற்றை கட்டுப்படுத்தும் நடவடிக்கையில், நிர்வாகம் தீவிரம் காட்டவில்லை.

இதனால், மாநகராட்சி நிர்வாகத்தை கண்டித்து, மக்கள் விழிப்புணர்வு சங்கம் சார்பில் நேற்று, கொசு வலை போர்த்திக்கொண்டு நுாதன போராட்டம் நடத்தினர். இந்த போராட்டத்தில், 11 பேர் பங்கேற்றனர்.

'மாநகராட்சி கொசு மருந்து மற்றும் புகை அடிப்பதில்லை. கொசுவால் மக்களுக்கு நாள்தோறும் பல்வேறு நோய்கள் பரவுகின்றன.

அதனால், கொசு தொல்லையை கட்டுப்படுத்தும் நடவடிக்கையில் தீவிரம் காட்ட வேண்டும்' என்று கோஷங்கள் எழுப்பினர்.