வானுார்: வானுார் அருகே மொபைல் போன் திருடிய வாலிபரை போலீசார் கைது செய்தனர்.

வானுார் அடுத்த ஒட்டை சாலை, அண்ணாமலை நகரைச் சேர்ந்தவர் ராம்குமார். மெக்கானிக். இவர், நேற்று ஒர்க் ஷாப்பில் இருந்து மதியம் சாப்பாட்டிற்கு வீட்டிற்கு சென்றார்.

முன்பக்க கதவைத் திறந்தவுடன், பின்பக்க கதவு வழியாக ஒருவர் ஓட்டம் பிடித்துள்ளார். சந்தேகமடைந்த ராம்குமார், அந்த வாலிபரை துரத்திச்சென்று பிடித்து விசாரித்த போது, வீட்டில் மொபைல் போன் திருடி தப்பியோடியது தெரியவந்தது. அந்த நபரை ராம்குமார் வானுார் போலீசில் ஒப்படைத்தார்.

போலீஸ் விசாரணையில், திருச்சிற்றம்பலம் கூட்ரோடு பகுதியைச் சேர்ந்த பன்னீர்செல்வம் மகன் அசோக்குமார், 25; என்பது தெரிய வந்தது. உடன் அவர் மீது வழக்குப் பதிந்து கைது செய்தனர்.