தேவிபட்டினம்: தேவிபட்டினம் அருகே இலந்தைகூட்டம் பகுதி இளைஞர்கள் பழனிவலசை கிராமத்தில் புகுந்து தாக்குதல் நடத்திய பிரச்னையில் 9 பேர் மீது வழக்கு பதிந்த போலீசார் 5 பேரை கைது செய்தனர்.

தேவிபட்டினம் அருகே இலந்தைகூட்டம் பகுதியை சேர்ந்த சிலர் சில வாரங்களுக்கு முன்பு பழனிவலசையை சேர்ந்த இளம்பெண்ணை கேலி செய்துள்ளனர். இதற்கு பழனிவலசையை சேர்ந்தவர்கள் கேலி செய்த இளைஞர்களை கண்டித்துள்ளனர்.

இதனால் ஆத்திரமடைந்த இலந்தைகூட்டம் பகுதியை சேர்ந்த இளைஞர்கள் நேற்று முன் தினம் இரவில் பழனிவலசை கிராமத்திற்குள் ஆயுதங்களுடன் புகுந்து அப்பகுதியில் இருந்தவர்களை தாக்கினர். இதில் பழனிவலசை உதயகுமார் 44, லோகநாதன் 40, ஆகியோர் படுகாயம் அடைந்தனர்.

இது தொடர்பான சி.சி.டி.வி., பதிவுகள் சமூக வலைதளத்தில் வெளியாகியது. இது குறித்த புகாரில் 9 பேர் மீது வழக்கு பதிந்த போலீசார் இலந்தை கூட்டம் பிரபு தேவா 28, முனீஸ்வரன் 19, லோகேஷ் 19, சிவக்குமார் 20, வாளேஸ்வரன் 25, ஆகிய ஐந்து பேரை தேவிபட்டினம் போலீஸ் எஸ்.ஐ., ஜெகநாதன் கைது செய்து விசாரிக்கிறார்.

--