அன்னுார்; திம்மநாயக்கன்புதுார் மகா பைரவர் கோவிலில், வரும் 23ம் தேதி ஜென்ம அஷ்டமி விழா நடக்கிறது.

அன்னுாரில் இருந்து மொண்டிபாளையம் செல்லும் வழியில், திம்மநாயக்கன்புதுாரில், மகா பைரவர் கோவில் உள்ளது இக்கோவிலில் ஒவ்வொரு மாதமும் தேய்பிறை அஷ்டமி அன்று சிறப்பு வழிபாடு நடக்கிறது.

கார்த்திகை மாதம் வருகிற தேய்பிறை அஷ்டமி, ஜென்ம அஷ்டமி என்று கொண்டாடப்படுகிறது. இங்கு பைரவருக்கு தனி கோவில் அமைக்கப்பட்டுள்ளதால் அதிகளவில் பக்தர்கள் வந்து வழிபாடு செய்து வருகின்றனர்.

ஜென்ம அஷ்டமியை முன்னிட்டு, வருகிற 23ம் தேதி இரவு 7:00 மணிக்கு சிறப்பு வேள்வி பூஜை நடக்கிறது. இதையடுத்து வாணவேடிக்கையுடன் 1008 லிட்டர் பன்னீரால் பைரவருக்கு அபிஷேகமும், பின்னர் அலங்கார பூஜையும், இரவு அன்னதானமும் நடைபெறுகிறது.

விழாவில் பங்கேற்று இறையருள் பெற விழா குழுவினர் அழைப்பு விடுத்துள்ளனர்.