திருவனந்தபுரம் : கேரளாவின் திருவனந்தபுரத்தைச் சேர்ந்தவர் மனோஜ், 44; டியூஷன் ஆசிரியர். 2019 ஜூலை 2ல், சிறப்பு வகுப்பு எடுப்பதாகக் கூறி, பிளஸ் 1 மாணவியை டியூஷன் சென்டருக்கு வரவழைத்து, அவர் பலாத்காரம் செய்தார். மேலும், அதை மொபைல் போனில் அவர் வீடியோ எடுத்தார். இதனால் பயந்து போன மாணவி, டியூஷன் செல்வதை பாதியிலேயே நிறுத்தினார். இதையடுத்து மாணவியின் நிர்வாண படங்கள் சமூக வலைதளங்களில் பரவின. இதை பார்த்து அதிர்ச்சி அடைந்த அவரது குடும்பத்தினர், போலீசில் புகார் அளித்தனர்.

இது குறித்து வழக்குப் பதிந்த போலீசார், டியூஷன் ஆசிரியர் மனோஜை கைது செய்தனர். முதலில் குற்றத்தை மறுத்த அவர், பின் ஒப்புக் கொண்டார். இதையறிந்த மனோஜின் மனைவி, தற்கொலை செய்து கொண்டார்.

மாணவி பலாத்கார வழக்கை, திருவனந்தபுரத்தில் உள்ள சிறப்பு விரைவு நீதிமன்றம் விசாரித்தது. இரு தரப்பு வாதங்கள் நிறைவடைந்த நிலையில், நேற்று தீர்ப்பு அளிக்கப்பட்டது.

மாணவியை பலாத்காரம் செய்த டியூஷன் ஆசிரியர் மனோஜுக்கு, 111 ஆண்டுகள் சிறை தண்டனையும், 1.05 லட்சம் ரூபாய் அபராதமும் விதித்து நீதிபதி ஆர்.ரேகா தீர்ப்பளித்தார். அபராதத்தை செலுத்த தவறினால் மேலும் ஓராண்டு சிறை தண்டனையை அனுபவிக்க வேண்டும் என்றும் நீதிபதி ஆர்.ரேகா குறிப்பிட்டார்.