மும்பை: இண்டியா கூட்டணியில் பிளவு அதிகரித்து வருவதால் உள்ளாட்சி தேர்தலில் தனித்து போட்டியிடுவோம் என்று உத்தவ் சேனாவின் மாநிலங்களவை உறுப்பினர் சஞ்சய் ராவத் கூறினார்.

மும்பை, தானே, நாக்பூர் மற்றும் பிற நகராட்சிகள், ஜில்லா பரிஷத்கள் மற்றும் பஞ்சாயத்துகளில் நடைபெறும் நகராட்சித் தேர்தல்களில் தனியாகப் போட்டியிடப் போவதாக சிவசேனாவின் உத்தவ் பிரிவு இன்று அறிவித்தது, இது மகாராஷ்டிராவில் இண்டியா கூட்டணிக்கு பின்னடைவாகும்.

2024 லோக்சபா தேர்தலுக்குப் பிறகு இண்டியா கூட்டணியின் ஒரு கூட்டம் கூட நடக்கவில்லை என்று சஞ்சய் ராவத் ஏற்கனவே கூறியிருந்தார். மும்பையில் சஞ்சய் ராவத் அளித்த பேட்டி:

உள்ளாட்சி தேர்தலில் கூட்டணியாக போட்டியிட்டால், அது கட்சியின் வளர்ச்சியைத் தடுக்கிறது. நாங்கள் எங்கள் பலத்தின் அடிப்படையில் போட்டியிடுவோம்.

மகாராஷ்டிராவில் உள்ள இண்டியா கூட்டணிக்கு ஒரு ஒருங்கிணைப்பாளரைக் கூட அவர்களால் நியமிக்க முடியவில்லை. இது நல்லதல்ல. கூட்டணியின் மிகப்பெரிய கட்சியாக, கூட்டத்தைக் கூட்டுவது காங்கிரஸின் பொறுப்பாகும்.

இவ்வாறு ராவத் கூறினார்.

வஞ்சித் பகுஜன் அகாடி தலைவர் பிரகாஷ் அம்பேத்கர் கூறுகையில், 'இண்டியா கூட்டணியிலிருந்து விலகுவதற்கான உத்தவ் தாக்கரேவின் முடிவு அவரது மகன் ஆதித்யாவின் நலனுக்காக எடுக்கப்பட்டது. தேசியவாத காங்கிரஸ் கட்சி (சரத்பவார்அணி) தலைவர் சரத் பவார் ஆர்.எஸ்.எஸ்.ஐப் பாராட்டிய பிறகு இந்த அறிவிப்பு வந்துள்ளது' என்றார்.