புதுடில்லி: இந்தியன் ஓபன் பாட்மின்டன் காலிறுதியில் தோல்வியடைந்தார் சிந்து.
இந்திய ஓபன் 'சூப்பர் 750' பாட்மின்டன் தொடர் டில்லியில் நடக்கிறது. நேற்று நடந்த ஒற்றையர் பிரிவு காலிறுதியில், 'நம்பர்-16' ஆக உள்ள இந்தியாவின் சிந்து, உலகத் தரவரிசையில் 5வதாக உள்ள இந்தோனேஷியாவின் மரிஸ்காவை எதிர்கொண்டார்.
முதல் செட்டை சிந்து 9-21 என மோசமாக இழந்தார். பின் சுதாரித்த இவர், அடுத்த செட்டை 21-19 என வசப்படுத்தினார். வெற்றியாளரை முடிவு செய்ய நடந்த மூன்றாவது, கடைசி செட் 17-17 என சமனில் இருந்தது. அடுத்து தொடர்ந்து 4 'கேமை' இழந்த சிந்து, 17-21 என கோட்டை விட்டார் சிந்து.
முடிவில் சிந்து 9-21, 21-19, 17-21 என போராடி வீழ்ந்தார். கடைசியாக 2017ல் கோப்பை வென்ற சிந்து, மீண்டும் ஏமாற்றினார்.
மற்றொரு காலிறுதியில் இந்தியாவின் கிரண், 13-21, 19-21 என சீனாவின் வெங்கிடம் தோல்வியடைந்தார்.
ஆண்கள் இரட்டையர் காலிறுதியில் இந்தியாவின் சாத்விக்சாய்ராஜ், சிராக் ஷெட்டி ஜோடி, தென் கொரியாவின் யோங் ஜின், மின் காங் ஜோடியை சந்தித்தது. இதில் இந்திய ஜோடி 21-10, 21-17 என்ற நேர் செட்டில் வெற்றி பெற்று அரையிறுதிக்கு முன்னேறியது.