வாழப்பாடி:ஆனைமடுவு அணையின் தலைமை மதகு தானாக திறந்து தண்ணீர் வெளியேறி, வசிஷ்ட நதியில் வெள்ளப்பெருக்கு ஏற்பட்டதால் கரையோர மக்கள் அதிர்ச்சி அடைந்தனர்.

சேலம் மாவட்டம் வாழப்பாடி அடுத்த புழுதிக்குட்டையில், 67.25 அடி உயரத்தில் ஆனைமடுவு அணை உள்ளது. அங்கு நேற்று காலை, 8:00 மணி நிலவரப்படி அணை நிரம்பி இருந்தது.

மதியம், 1:30 மணிக்கு, அணையின் தலைமை மதகு வழியே, அதிகளவில் தண்ணீர் ஆர்ப்பரித்துக் கொட்டியது. இதனால் வசிஷ்ட நதியில் வெள்ளப்பெருக்கு ஏற்பட்டதால், அப்பகுதி கரையோர மக்கள், விவசாயிகள் அதிர்ச்சி அடைந்தனர்.

ஷட்டர் உடையும் நிலையில் உள்ளதாக தகவல் பரவியது. இதனால் கரையோர மக்கள், விவசாயிகள் உடனடியாக, நீர்வளத்துறை அதிகாரிகளுக்கு தகவல் தெரிவித்தனர்.

அப்போது தான், தலைமை மதகின் ஷட்டர், தானாக திறந்து தண்ணீர் வெளியேறியது தெரிந்தது. இதையடுத்து, அங்கு சென்ற அதிகாரிகள், 1 மணி நேரத்தில், ஷட்டரை சீரமைத்து, நீர் வெளியேறுவதை நிறுத்தினர்.

இதுகுறித்து நீர்வளத்துறை அதிகாரிகள் கூறுகையில், 'எலக்ட்ரிக் சர்க்யூட் பழுதால், ஷட்டர் தானாக திறந்துள்ளது. சிறிது நேரத்தில் சரி செய்யப்பட்டது' என்றனர்.