ஆர்.கே.பேட்டை, பள்ளிப்பட்டு, திருத்தணி உள்ளிட்ட பகுதியில் வசிக்கும் நெசவாளர்களின் நீண்டகால கோரிக்கையான ஜவுளி பூங்கா குறித்த அறிவிப்பு பட்ஜெட்டில் வெளியாகும் என, எதிர்பார்த்திருந்த நிலையில் ஏமாற்றமே மிஞ்சியுள்ளது. திருத்தணியை மையமாக வைத்து, ஜவுளி பூங்கா ஏற்படுத்தப்படும் என, 10 ஆண்டுகளாக பல்வேறு கட்சியினரும் தேர்தல் வாக்குறுதி அளித்து வருகின்றனர் என்பது குறிப்பிடத்தக்கது.-- ஏ.மணிமாறன், அம்மையார்குப்பம்.

ஆந்திர மாநிலத்தில் ஒரு விவசாயிக்கு, 7,000 ரூபாயும், தெலுங்கானாவில், ஒரு ஏக்கருக்கு 10,000 ரூபாயும், கர்நாடக மாநிலத்தில், 4,000 ரூபாயும் விவசாய கவுர நிதி வழங்கப்படுகிறது. ஆனால், தமிழகத்தில் நேற்று வெளியான வேளாண் பட்ஜெட்டில், அதுபோன்ற கவுர நிதி ஏதும் ஒதுக்கப்படவில்லை. விவசாயிகளுக்கு காப்பீடு தொகை, ஆந்திர மாநிலத்தில் முழுதும் அரசே ஏற்கிறது. ஆனால், தமிழகத்தில் காப்பீடு தொகை, பங்கு தொகை செலுத்த வேண்டியுள்ளது. தேர்தல் வாக்குறுதியாக, ஒரு டன் கரும்பு, 4,000 ரூபாய்க்கு கொள்முதல் செய்யப்படும் என அறிவிக்கப்பட்டது. ஆனால், ஒரு டன் கரும்புக்கு, 250 ரூபாய் ஊக்கத்தொகை மட்டுமே அரசு அறிவித்துள்ளது.விவசாயிகளின் எதிர்பார்ப்புகள் எதுவும் வேளாண் பட்ஜெட்டில் இடம் பெறாதது அதிருப்தியை ஏற்படுத்தியுள்ளது. அதே நேரத்தில், முதல்வர் உழவர் நல சேவை மையம், நிலமற்ற வேளாண் தொழிலாளர்களுக்கு விபத்து இறப்பு இழப்பீடு உள்ளிட்ட விபத்து கால இழப்பீடு தொகை அதிகரித்துள்ளது ஆறுதல் அளித்துள்ளது.- ஒய்.வேணுகோபால், விவசாயிகள் சங்க தலைவர், திருவள்ளூர்.

திருத்தணி - அரக்கோணம் மாநில நெடுஞ்சாலை, திருத்தணி - சித்துார் மாநில நெடுஞ்சாலை ஆகிய பகுதிகளில் போக்குவரத்து நெரிசல், விபத்து பிரச்னையை தீர்க்க, தேர்தல் வாக்குறுதியில் வெளிவட்ட சாலை அமைக்கப்படும் என அறிவிக்கப்பட்டது. திருத்தணி நகராட்சியில் வெளியேறும் கழிவுநீர் நந்தியாற்றில் கலப்பதை தடுக்க சுத்திகரிப்பு செய்வது, கால்நடை மருந்தகம் தரம் உயர்த்துதல் உள்ளிட்டவை குறித்தும் அறிவிப்பு வெளியாகவில்லை. இதன் காரணமாக, தொகுதி மக்களும் கடும் அதிருப்தியடைந்து உள்ளனர்.

சென்னை - கும்மிடிப்பூண்டி ரயில் மார்க்கத்தில் உள்ள விம்கோ நகர் வரை, மெட்ரோ ரயில் சேவை இருக்கிறது.இதை மீஞ்சூர் வரை நீட்டிக்க வேண்டும் என, பயணியர் தொடர்ந்து வலியுறுத்தி வருகின்றனர். இது தொடர்பான அறிவிப்பு வராதது ஏமாற்றத்தை ஏற்படுத்தி உள்ளது.நீர்நிலைகளை ஆழப்படுத்தி, விவசாயத்திற்கு பாசன வசதிகள் மேம்படுத்துவதற்கான எந்த திட்டமும் இல்லை. தண்ணீர் பற்றாக்குறையால் கோடைக்கால பயிர்களை தவிர்த்து வரும் விவசாயிகளுக்கு, மாற்று வழிமுறைகள் குறித்தும் எவ்வித அறிவிப்பும் இல்லை. மீஞ்சூர் ஒன்றியம் முழுதும் நீடிக்கும் குடிநீர் தட்டுப்பாட்டை போக்குவதற்கு நீண்டகால திட்டங்கள் எதுவும் பட்ஜெட்டில் இல்லாதது பெரும் ஏமாற்றத்தை அளித்துள்ளது.