சிவகாசி: சிவகாசி காளீஸ்வரி கல்லுாரியின் வெள்ளி விழாவை முன்னிட்டு உடற்கல்வி துறை சார்பில் மினி மாரத்தான் போட்டி நடந்தது.

கல்லுாரி செயலர் செல்வராஜன், சிவகாசி சப் கலெக்டர் பிரியா ரவிச்சந்திரன் கொடியசைத்து துவக்கி வைத்தனர். கல்லுாரி உடற்கல்வித்துறை இயக்குனர் யோகேஸ்வரன் வரவேற்றார். கல்லுாரி முதல்வர் பாலமுருகன், துணை முதல்வர் முத்துலட்சுமி காளீஸ்வரி பயர் ஒர்க்ஸ் இயக்குனர் ராஜேஷ் வாழ்த்தினர்.

ரயோலா பள்ளி விளையாட்டு மைதானத்தில் இருந்து கல்லுாரி மைதானம் வரை பள்ளி மாணவர் பிரிவினருக்கு 5 கிலோமீட்டர் துாரமும், செங்கமல நாச்சியார்புரம் விளையாட்டு மைதானத்தில் இருந்து கல்லுாரி வரை பொது பிரிவினருக்கு ஏழு கிலோமீட்டர் துாரமும் நிர்ணயம் செய்யப்பட்டிருந்தது. பள்ளி மாணவர் பிரிவில் 1500 பேர், பொது பிரிவில் 600 பேர் பங்கேற்றனர்.