திருப்பூர் : திருப்பூர் மாவட்டத்தில் நடந்த பல்வேறு கொலை சம்பவங்கள், போலீசாரைத் திணறடித்துவருகின்றன. ஆண்டுக்கணக்காகியும் குற்றவாளிகளைக் கண்டறிய முடியவில்லை.

பல்லடம் அருகே சேமலைக் கவுண்டம்பாளையத்தில் தோட்டத்து வீட்டில் வசித்து வந்த தெய்வசிகாமணி, 78, மனைவி அலமேலு, 75. மகன் செந்தில்குமார், 46 ஆகிய மூன்று பேர், 2024 நவ., 28ம் தேதி இரவு கொடூரமாக கொலை செய்யப்பட்டனர். அவிநாசிபாளையம் போலீசார் வழக்குப்பதிவு செய்தனர். கொடூர கொலையில் தொடர்புடையவர்களை பிடிக்க தனிப்படை மூலமாக பல கட்ட விசாரணை நடத்தியும் வழக்கில் எவ்வித முன்னேற்றமும் ஏற்படவில்லை. கொலை நடந்து, நான்கு மாதங்களுக்கு மேலாகியும், கொலையாளிகளை நெருங்க முடியவில்லை.

கடந்த மாதம் இவ்வழக்கு சி.பி.சி.ஐ.டி.,க்கு மாற்றப்பட்டது. கடந்த, இரு வாரங்களாக, இரண்டு டி.எஸ்.பி., எட்டு இன்ஸ்பெக்டர் அடங்கிய தனிப்படை குழுவினர் விசாரித்து வருகின்றனர். இதுவரை எவ்வித முன்னேற்றமும் இல்லாமல் உள்ளது.

இதேபோல், மாவட்டம் முழுவதும் பல்வேறு கொலை வழக்குகளில் குற்றவாளிகளை கண்டறிய முடியாத நிலை உள்ளது.

மாநகர்

திருப்பூர் மாநகர போலீஸ் எல்லைக்கு உட்பட்ட அனுப்பர்பாளையம், வேலம்பாளையம், நல்லுார் போலீஸ் ஸ்டேஷன் என, மூன்று பகுதியில் நடந்த கொலை வழக்கில் எவ்வித முன்னேற்றம் இல்லாமல் உள்ளது.

* 2020 நவ., மாதத்தில், திருப்பூர், பொம்மநாயக்கன்பாளையத்தில் சுப்பிரமணி, 50 என்பவரை கொலை செய்து, நகை, பணத்தை கொள்ளையடித்து சென்றனர். இவ்வழக்கில், குடும்பத்தினர், உறவினர், நண்பர்கள் என, பலரிடம் விசாரணை நடந்தது. கடந்த, ஐந்து ஆண்டுகளாக இவ்வழக்கில் எவ்வித முன்னேற்றமும் இல்லாமல் உள்ளது. நிலம் விற்பனையில் பிரச்னையா, பணத்திற்காக கொலை செய்யப்பட்டாரா என்பது குறித்து தெரியவில்லை.

கொலையானவர் யார்?

* 2021 நவ., 9ம் தேதி, திருப்பூர், 15 வேலம்பாளையம், சோளிபாளையம் காட்டுப் பகுதியில் கடந்த ஆண் சடலம் கிடந்தது. வேலம்பாளையம் போலீசார் சடலத்தை கைப்பற்றி விசாரித்தனர். 40 முதல், 45 வயது மதிக்கதக்க, அந்நபரின் உடலில், எட்டு இடங்களில் கத்தியால் குத்தப்பட்ட காயம் இருந்தது. கொலையான நபரை கண்டறிய போலீசார், சடலத்தை போட்டோவாக அச்சிட்டு, மாநகர பகுதியில் ஒட்டியும், ஆட்டோ மூலமாக பிரச்சாரம் செய்தனர். ஆனால், எதுவும் பலனளிக்கவில்லை.

* 2022 பிப்., 7ம் தேதி, திருப்பூர் - தாராபுரம் ரோடு பொல்லிக்காளிபாளையம் அருகே ரோட்டோரம் சாக்கடை கால்வாய்க்குள் சூட்கேஸ் கிடந்தது. போலீஸ் விசாரணையில், 24 வயது பெண்ணின் சடலம் இருந்தது. 'சிசிடிவி' பதிவில், டூவீலரில் வந்த, இருவர் 'சூட்கேஸ்' பெட்டியை போட்டு சென்றதும், கொல்லப்பட்ட பெண் அசாம் மாநிலத்தை சேர்ந்த, நேகா, 24 என்பதும் தெரிந்தது. கொலை தொடர்பாக, கொலையான கணவர் அபிஜித், நண்பர் ஜெயலால் சவுராவை தேடினர். ஒசூரில் ஜெயலால் சவுராவை, 27 போலீசார் கைது செய்தனர். தலைமறைவாக உள்ள கணவரை போலீசார் தொடர்ந்து தேடி வந்தனர். அசாம் உள்ளிட்ட மாநிலத்துக்கு தனிப்படையினர் தேடிச்சென்று அபிஜித்தை பிடிக்க பிடியாமல் திரும்பினர். இதுவரை, அவர் போலீசிடம் சிக்கவே இல்லை.