விருத்தாசலம்: விருத்தாசலம் அருகே தந்தையின் இறுதிச்சடங்கில், காதலித்த பெண்ணை மகன் திருமணம் செய்துகொண்ட சம்பவம் நெகிழ்ச்சியை ஏற்படுத்தியது.

கடலுார் மாவட்டம், விருத்தாசலம் அடுத்த கவணை கிராமத்தை சேர்ந்தவர் செல்வராஜ். ஓய்வு பெற்ற ரயில்வே ஊழியர். இவரது மனைவி கண்ணம்மாள். இவர்களது இரண்டாவது மகன் அப்பு. வழக்கறிஞருக்கு படித்துள்ளார். இவரும், விருத்தாசலம் கொளஞ்சியப்பர் அரசு கல்லுாரியில் மூன்றாமாண்டு மாணவி விஜயசாந்தி என்பவரும் 4 ஆண்டுகளாக காதலித்தனர். இருவீட்டார் சம்மதத்துடன் திருமணம் செய்ய காத்திந்த நிலையில், அப்புவின் தந்தை உடல்நலக்குறைவால் நேற்று முன்தினம் இறந்தார். நேற்று மாலை 4:00 மணிக்கு, அவரது வீட்டில் இறுதிச்சடங்கு ஏற்பாடுகள் நடந்தன. அப்போது, காதலியை அழைத்து வந்த அப்பு, தந்தையின் இறுதிச்சடங்கில், அவரது கைகளால் தாலியை எடுத்து கொடுக்க வைத்து, திருமணம் செய்து கொண்டார்.

துக்க நிகழ்விலும், அவரது தாய், உறவினர்கள் மற்றும் கிராம மக்கள் அனைவரும் மணமக்களுக்கு ஆசி வழங்கினர். பெண்ணின் உறவினர்களுக்கு உடன்பாடு இல்லாததால், திருமணத்தில் பங்கேற்கவில்லை. பெற்றோர் முன்னிலையில் திருமணம் செய்து கொள்ள நினைத்த மகன், தந்தையின் சடலம் முன் காதலித்த பெண்ணை கரம்பிடித்த சம்பவம், நெகிழ்ச்சியை ஏற்படுத்தியது.