தஞ்சாவூர்:தஞ்சாவூர் மாவட்டத்தில் இருந்து கும்பகோணத்தை பிரித்து, தனி வருவாய் மாவட்டமாக அரசு அறிவிக்க, மக்கள் 25 ஆண்டுகளாக கோரிக்கை விடுத்து வருகின்றனர்.

இந்நிலையில், 'தி.மு.க., ஆட்சிக்கு வந்த, 100 நாட்களுக்குள் கும்பகோணம் மாவட்டம் அறிவிக்கப்படும்' என, தேர்தல் பிரசாரத்தில், முதல்வர் ஸ்டாலின் அறிவித்தார். ஆனால், நான்கு ஆண்டாகியும் அறிவிப்பு வெளியாகவில்லை.

தஞ்சாவூர் வந்த முதல்வரை சந்தித்து, கும்பகோணம் தனி மாவட்டம் தொடர்பாக கோரிக்கை மனு அளிக்க அனுமதி கேட்ட போது, மறுக்கப்பட்டது.

இதையடுத்து, கும்பகோணம் மாவட்டம் கோரும் போராட்ட குழு ஒருங்கிணைப்பாளர் ஸ்டாலின் தலைமையில், பா.ஜ., - த.மா.கா., - பா.ம.க., நாம் தமிழர், ஹிந்து மக்கள் கட்சி, தே.மு.தி.க., வணிகர்கள் என பல்வேறு அமைப்பினர், முதல்வரிடம் வழங்க வைத்திருந்த கோரிக்கை மனுவை, நேற்று காலை மகாமக குளத்தில் வீசி நுாதன போராட்டத்தில் ஈடுபட்டனர்.