பொதுக்குழுவுக்கு பின், வைகோ அளித்த பேட்டி: தமிழ் கடவுளாக போற்றப்படும் முருக பெருமான் அனைவருக்கும் சொந்தமானவர். கடவுளின் பெயரால் நடத்தும், எந்த மாநாடும் தவறானது. மதுரையில் நடந்த முருகனுக்கான மாநாட்டை, பா.ஜ., தான் பின்னால் நின்று நடத்தி இருக்கிறது. ஹிந்துக்களின் ஓட்டுக்களை பெறுவதற்காகவே, பா.ஜ., இப்படியெல்லாம் செய்கிறது. ஆனால், அதெல்லாம் நடக்காது.கட்சிக்கு ஆறு எம்.எல்.ஏ.,க்கள் இருந்தால், தேர்தல் கமிஷன் அங்கீகாரம் கிடைக்கும். அதற்காக, 6, 8, 10 என முடிந்த வரை 2026 சட்டசபை தேர்தலில் கூடுதல் சீட் கேட்போம். அதேநேரம், கூட்டணியில் இருப்பதால் ஆட்சியில் பங்கு கேட்க மாட்டோம். நாங்கள் தி.மு.க., கூட்டணியில் உள்ளோம். வேறு எந்த கூட்டணியுடனும் பேசவில்லை; அதை பற்றியும் நாங்கள் சிந்திக்கவே இல்லை. இவ்வாறு அவர் கூறினார்.

பொதுக்குழுவில், தி.மு.க., அரசை கண்டிக்கும் வகையில் நிறைவேற்றப்பட்ட தீர்மானங்களில், 'கடந்த 2021ல் தி.மு.க., ஆட்சிக்கு வந்ததும் 500 டாஸ்மாக் கடைகள் மூடப்பட்டன. அதன்பின், ஒரு கடையை கூட மூடவில்லை. அதேநேரம், 'எப்.எல்.,-2 மனமகிழ் மன்றம்' என்ற பெயரில் 1,000க்கும் மேற்பட்ட உரிமம் வழங்கப்பட்டுள்ளது. சிவகாசி அருகே, விஸ்வநத்தம் கிராமத்தில், 'மனமகிழ் மன்றம்' என்ற பெயரில் மதுபான விற்பனை நடப்பதாக நீதிமன்றமே தெரிவித்துள்ளது. புற்றீசலாய் முளைத்துள்ள மனமகிழ் மன்ற உரிமங்களை ரத்து செய்ய வேண்டும். 'தனியார் பள்ளிகளை விட அரசு பள்ளிகளின் எண்ணிக்கை 3 மடங்கு அதிகம். ஆனால், ஆசிரியர்கள் எண்ணிக்கை, தனியார் பள்ளிகளில் அதிகம். 34 அரசு மருத்துவக் கல்லுாரிகளில், குறைகளை சுட்டிக்காட்டி, தேசிய மருத்துவ ஆணையம் அறிக்கை அளித்துள்ளது' என கூறப்பட்டுள்ளது.