பனமரத்துப்பட்டி, பனமரத்துப்பட்டி வட்டாரத்தில் பாரப்பட்டி, வாழக்குட்டப்பட்டி, பள்ளித்தெருப்பட்டி, நாழிக்கல்பட்டி, சந்தியூர் உள்ளிட்ட இடங்களில் சின்னவெங்காயம் நடவு செய்யப்பட்டுள்ளது. அவை ஓரிரு மாதங்களுக்கு பின் அறுவடைக்கு வரும். ஆனால் தற்போது, சின்னவெங்காயம் வரத்து குறைந்து, அதன் விலை உயர்ந்துள்ளது.

இதுகுறித்து பனமரத்துப்பட்டியை சேர்ந்த உழவர் சந்தை விவசாயி தங்கவேல் கூறியதாவது:
தாதகாப்பட்டி உழவர் சந்தையில், 40 ரூபாய்க்கு விற்ற ஒரு கிலோ சின்னவெங்காயம், இன்று(நேற்று), 60 ரூபாய்க்கு விற்பனை செய்யப்பட்டது. உள்ளூரில் சின்னவெங்காயம் உற்பத்தி குறைந்ததால், வெளிமாவட்டங்களில் இருந்து விற்பனைக்கு வருகிறது. அதனால் விலை உயர்ந்துள்ளது. சேலம் மாவட்டத்தில் பரவலாக பயிரிடப்பட்டுள்ள சின்னவெங்காயம், 50 நாட்களுக்கு பின் அறுவடைக்கு வரும். அதன் பின், விலை குறைய வாய்ப்புள்ளது.
இவ்வாறு அவர் கூறினார்.