போனம்ஸ் (Bonhams) என்பது லண்டனில் அமைந்துள்ள உலகப் புகழ்பெற்ற ஏல நிறுவனம். ஒவ்வொரு ஆண்டும் அவர்கள் “The Golden Age of Motoring Sale” என்ற பெயரில், 1890 முதல் 1930 வரை உருவாக்கப்பட்ட பழமையான கார்கள், மோட்டார் சைக்கிள்கள் மற்றும் ஆட்டோமொபைல் நினைவுச்சின்னங்களை ஏலத்தில் விற்பனை செய்கின்றனர்.

இந்த ஆண்டில் (2025), 1901ஆம் ஆண்டின் அரிய வாகனங்கள் இடம்பெற்றுள்ளன. இவ்வாகனங்கள் அனைத்தும் இன்னும் இயங்கும் நிலையில் பராமரிக்கப்பட்டுள்ளன — சில 120 ஆண்டுகள் பழமையானவை!

நூற்றாண்டு பழமையான கார்கள் இன்று வெறும் வாகனங்களல்ல — அவை வரலாறு, கலை, மற்றும் பெருமையின் அடையாளம்.

கடந்த கால ஏல வரலாற்றில் அதிக விலைக்கு விற்கப்பட்ட சில கார்களின் விவரங்களை கேட்டால் மலைத்துப் போவீர்கள்.

1955-ல் தயாரிக்கப்பட்ட மெர்சிடிஸ் பென்ஸ் கார், 2022 ஆம் ஆண்டு நடந்த ஏலத்தில் இந்திய மதிப்பில் ரூ.1,150 கோடிக்கு விற்கப்பட்டது. இது உலக வரலாற்றிலேயே அதிக விலைக்கு விற்கப்பட்ட கார். காரணம் — அன்றைய காலகட்டத்தில் இந்த ரக கார்களில் வெறும் இரண்டு மட்டுமே தயாரிக்கப்பட்டன.

இதேபோல், அமெரிக்காவின் பெராரி ரேசிங் கார் ரூ.400 கோடிக்கும், ஹாலிவுட் நடிகர் கேரி கூப்பருக்குச் சொந்தமான டஸ்சன்பர்க் கார் ரூ.180 கோடிக்கும் ஏலத்தில் விற்கப்பட்டுள்ளன.

இந்த ஆண்டு ஏலத்தில் ஸ்காட்லாந்தில் உருவாக்கப்பட்ட ஆல்பியன் மாடல் கார், “டாக் கார்ட்” எனப்படும் பழைய திறந்த வடிவிலான கார் போன்றவை இடம்பெற்றுள்ளன.

இந்த கார்கள் உலகின் மிக ஆரம்பகால மோட்டார் வாகனங்களில் ஒன்றாகும். அவை மனித தொழில்நுட்ப வளர்ச்சியின் தொடக்கத்தைக் சாட்சியமாக்குகின்றன. 1900களின் தொடக்கத்தில் தயாரிக்கப்பட்ட கார்களில் சிலவே தற்போது உள்ளன.

இவை ஒவ்வொன்றும் சேகரிப்பாளர்களுக்கு மிக மதிப்புள்ளவை. சில உரிமையாளர்கள் தங்கள் கார்களின் அசல் இயந்திரம், மரப்பலகை, உலோகப் பகுதிகள் அனைத்தையும் காப்பாற்றி வைத்துள்ளனர். இதுவே அவற்றின் விலையை பெரிதாக உயர்த்துகிறது.

இவ்வளவு பணம் கொடுத்து இத்தகைய கார்களை வாங்கி என்ன செய்வார்கள்?

தங்களது தனிப்பட்ட அருங்காட்சியகங்களில் வைப்பர், கார் கண்காட்சிகள் மற்றும் ராலி நிகழ்ச்சிகளில் காட்டுவர். இத்தகைய கார்கள் காலம் செல்லச் செல்ல மதிப்பு அதிகரிப்பதால், மூலதன முதலீடாகவும் வைத்துக்கொள்வர். சிலர் திரைப்படங்கள் அல்லது விளம்பரங்களில் பயன்படுத்த அனுமதிப்பர்.

இந்தக் கார்களை யார் வாங்குவார்கள்?

பழமையான கார் சேகரிப்பாளர்கள், பணக்கார தொழிலதிபர்கள், ஹாலிவுட் நடிகர்கள், மோட்டார் அருங்காட்சியக நிர்வாகிகள் போன்றோரும், சில நேரங்களில் வாகன நிறுவனங்களே தங்களின் பழைய வரலாற்று மாடல்களை மீண்டும் வாங்கிக் கொள்கின்றன.

சிலர் இவ்வகை கார்களை அழகாக பராமரித்து, தங்கள் குடும்பத்திற்குப் பாரம்பரியச் சொத்தாக வைத்துக்கொள்கிறார்கள்.

இது மனித கைத்தொழில், கற்பனை, மற்றும் பொறியியல் வளர்ச்சியின் ஒரு நூற்றாண்டு பழமையான அடையாளம்.
அதனால் தான் உலகம் முழுவதும் மக்கள் இதற்காக கோடிக்கணக்கான ரூபாய்களை செலவிடத் தயாராக உள்ளனர்.

ஒன்று நிச்சயம் —இந்தக் கார்களை வாங்குவது பயன்பாட்டிற்காக அல்ல; அவை வரலாறு, பெருமை, மற்றும் முதலீட்டின் அடையாளமே!

- எல். முருகராஜ்