பெர்த்: வீடுகளுக்கு தினமும் 3 மணி நேரம் இலவச மின்சார வழங்கும் சோலார் ஷேரர் திட்டத்தை ஆஸ்திரேலியா அரசு அறிமுகப்படுத்த உள்ளது.
ஆஸ்திரேலியாவில் 2026 ஆம் ஆண்டில் செயல்பாட்டுக்கு வரும் என எதிர்பார்க்கப்படும் எரிசக்தி சேமிப்பு திட்டத்தின் கீழ், சூரிய மின்சக்தி பேனல்கள் இல்லாத வீடுகள் உள்பட, அனைத்து வீடுகளுக்கும் தினமும் குறைந்தது மூன்று மணி நேரம் இலவச சூரிய மின்சாரம் வழங்கும் திட்டம் கொண்டுவரப்பட உள்ளது என்று எரிசக்தி அமைச்சர் கிறிஸ் போவன் இன்று கூறினார்.

கிறிஸ் போவன் மேலும் கூறியதாவது:

ஜூலை 2026 க்குள் சோலார் ஷேரர் திட்டத்தை அறிமுகப்படுத்த உள்ளது, இதன் மூலம் மின்சார சில்லறை விற்பனையாளர்கள் நியூ சவுத் வேல்ஸ், தெற்கு ஆஸ்திரேலியா மற்றும் தென்கிழக்கு குயின்ஸ்லாந்தில் உள்ள வீடுகளுக்கு தினமும் குறைந்தது மூன்று மணிநேரம் இலவச மின்சாரம் வழங்க வேண்டும். இந்தத் திட்டம் அடுக்குமாடி குடியிருப்புவாசிகள் உட்பட அனைத்து வீடுகளுக்கும் பொருந்தும்.

பயனாளர்கள், ஒரு ஸ்மார்ட் மீட்டரை வைத்திருக்க வேண்டும் மற்றும் சூரிய மின் உற்பத்தி நேரங்களுக்கு ஆற்றல் பயன்பாட்டை மாற்ற சோலார் ஷேரர் திட்டத்தைத் தேர்வுசெய்ய வேண்டும். இதன்மூலம் பகல் நேரத்தில் பயனர்கள் இலவச சூரிய மின்சாரத்தைப் பெறுவார்கள்.
இவ்வாறு கிறிஸ் போவன் கூறினார்.

கிறிஸ் போவன் இந்த திட்டம் பற்றி கூறியதை அடுத்து,ஆஸ்திரேலியாவின் மிகப்பெரிய மின்சார சப்ளையர்களாக இருக்கும் நிறுவனங்களான ஏஜிஎல், ஆரிஜின் எனர்ஜி ஆகியவற்றின் பங்கு விலைகள் பிற்பகலில் 3 சதவீதம் சரிந்தன என்பது குறிப்பிடத்தக்கது.