வாழப்பாடி: வாழப்பாடி, அய்யாகவுண்டர் தெருவை சேர்ந்த, பெரிய தம்பி மகள் லதா, 25. வாய் பேச முடியாத நிலையில், சற்று மன நலம் பாதிக்கப்பட்டிருந்தார். கடந்த, 19 இரவு வீட்டில் இருந்து மாயமானார்.

அவரது தாய் கவிதா புகார்படி, வாழப்பாடி போலீசார் தேடினர். இதுகுறித்து, நம் நாளிதழில் நேற்று செய்தி வெளியானது. இதன் எதிரொலியாக, மறுவாழ்வு மையத்தில் இருந்த அப்பெண், நேற்று மீட்கப்பட்டார்.

இதுகுறித்து, வாழப்பாடி இன்ஸ்பெக்டர் வேல்முருகன் கூறியதாவது: சேலம், அன்னதானப்பட்டியில், வாய் பேச முடியாமல் நின்றிருந்த லதாவை, அன்னதானப்பட்டி போலீசார் மீட்டு, 'லிட்டில் ஹார்ட்ஸ்' எனும் மறுவாழ்வு மையத்தில் சேர்த்தார். இந்நிலையில் காலைக்கதிர் நாளிதழில் வெளியான செய்தியை பார்த்த அன்னதானப்பட்டி போலீசார், அப்பெண்ணின் தகவலை, எங்களுக்கு தெரிவித்தனர். தொடர்ந்து லதா மீட்கப்பட்டு பெற்றோரிடம் ஒப்படைக்கப்பட்டார். இவ்வாறு அவர் கூறினார்.