மேலுார்: கொட்டகுடி அங்கன்வாடி மைய கட்டட சுவரில் தண்ணீர் கசிவதால் குழந்தைகளின் பாதுகாப்பு கேள்விக்குறியாகி வருகிறது.

பெருமாள் குளம் அருகே 16 ஆண்டுகளாக செயல்படும் இம்மையத்தை சுற்றி தண்ணீர் தேங்கியும், புதர் மண்டியும் காணப்படுகிறது. சமைக்க, பருக தெருக்குழாய் நீரை பயன்படுத்துகின்றனர்.

பெற்றோர் கூறியதாவது: சுவர்களில் வெடிப்பு ஏற்பட்டு தண்ணீர் கசிவதால் எப்ப விழுமோ என்ற பயம் ஏற்பட்டுள்ளது. மையம் அருகே குப்பை கொட்டுவதால் சுகாதாரக்கேடு ஏற்படுகிறது. ரோட்டில் கழிவு நீரை கடந்து மையத்திற்கு குழந்தைகள் செல்வதால் தொற்றுநோய் அபாயம் நிலவுகிறது. ஜன்னலை திறந்தாலே புதர் மண்டிய பகுதியிலிருந்து விஷ பூச்சிகள் வருவதால் ஜன்னலை அடைத்தே வைத்துள்ளனர். மாவட்ட நிர்வாகம் கட்டடத்தின் உறுதி தன்மையை ஆய்வு செய்து வலுவிழந்து இருந்தால் புதிய மையம் கட்ட வேண்டும் என்றனர்.

ஊராட்சி செயலாளர் கணேசன் கூறுகையில், மையத்தை சுற்றி தேங்கி கிடக்கும் தண்ணீரை வெளியேற்றிவிட்டோம். உடனடியாக புதர் அகற்றப்படும். உயரதிகாரிகளுடன் கலந்து பேசி மராமத்து பார்க்கப்படும் என்றார்.