- நமது நிருபர் -



சிறுபான்மையினரை பாதுகாப்பதில், தங்களுக்கு நிகர் எவரும் இல்லை என கூறிக்கொள்ளும் தி.மு.க.,வின் வேட்பாளர் பட்டியலில், நான்கு முஸ்லிம்கள் மட்டுமே இடம் பெற்றுள்ளனர்.

தி.மு.க., கூட்டணியில் காங்கிரஸ் 28, தே.மு.தி.க., 10, விடுதலை சிறுத்தைகள் எட்டு உட்பட கூட்டணி கட்சிகளுக்கு 70 தொகுதிகள் ஒதுக்கப்பட்ட நிலையில், 164 தொகுதிகளில் தி.மு.க., களமிறங்குகிறது.

இந்நிலையில், தி.மு.க., சார்பாக நான்கு முஸ்லிம் வேட்பாளர்கள் மட்டுமே களத்தில் உள்ளனர். அதன்படி, பாளையங்கோட்டையில் அப்துல் வஹாப், ராயபுரத்தில் சுபேர்கான், செஞ்சியில் மஸ்தான், ஆவடியில் நாசர் என போட்டியிடுகின்றனர்.

கூட்டணி கட்சியான இந்திய யூனியன் முஸ்லிம் லீக் சார்பில் பாபநாசத்தில் ஷாஜகான், வாணியம்பாடியில் சையது பாரூக் ஆகியோரும், மனிதநேய ஜனநாயக கட்சி சார்பில் சிதம்பரத்தில் தமிமுன் அன்சாரியும் போட்டியிடுகின்றனர்.

இதுபோல, வி.சி.க., சார்பில் பண்ருட்டியில் அப்துல் ரகுமான் களமிறங்குகிறார்-.

தே.மு.தி.க., சார்பில், ஒரு முஸ்லிம் வேட்பாளர் கூட இல்லை. ஆனால், நாயுடு சமூகத்தைச் சேர்ந்த ஆறு பேருக்கு வாய்ப்பு அளிக்கப்பட்டுள்ளது.

இதுபோல, ஐந்து தொகுதிகளில் போட்டியிடும் இ.கம்யூ.,வும், நான்கு தொகுதிகளில் போட்டியிடும் ம.தி.மு.க.,வும் முஸ்லிம் வேட்பாளர்களை அறிவிக்கவில்லை.