- நமது நிருபர் -

அ.தி.மு.க., பொதுச்செயலர் பழனிசாமி, சேலம் மாவட்டம் இடைப்பாடி தொகுதியில் போட்டியிடுகிறார்; நேற்று வேட்பு மனு தாக்கல் செய்தார்.


அப்போது, அவர் சமர்ப்பித்த பிரமாண பத்திரத்தில் உள்ள விபரம்: பழனிசாமியிடம் 50,000 ரூபாய்; அவரது மனைவி ராதாவிடம் 1 லட்சம் ரூபாய் ரொக்கம் உள்ளன. அவர் பெயரிலோ, அவர் மனைவி பெயரிலோ கார் உட்பட எந்த வாகனங்களும் இல்லை. பழனிசாமியிடம் 100 கிராம் தங்க நகை, அவர் மனைவியிடம் 720 கிராம் தங்க நகை உள்ளன. மொத்தமாக பழனிசாமிக்கு 3.16 கோடி ரூபாய் அசையும் சொத்து உள்ளது.

அவர் பெயரில் அசையா சொத்துக்கள் ஏதும் இல்லை. அவர் மனைவி ராதா மற்றும் குடும்பத்தினர் பெயரில், 5.83 கோடி ரூபாய் அசையா சொத்து உள்ளது. மொத்தமாக பழனிசாமி பெயரில், 8.99 கோடி ரூபாய் அசையும், அசையா சொத்துக்கள் உள்ளன. கடன் 17 லட்சம் ரூபாய்; ஐந்து குற்றவியல் வழக்குகள் உள்ளன என தெரிவித்துள்ளார்.

தொழில் விவசாயம் என தெரிவித்துள்ள பழனிசாமிக்கு, சொந்தமாக வேளாண் நிலங்கள் இல்லை. கடந்த 2021 சட்டசபை தேர்தலின்போது, பழனிசாமி தனக்கு 6.70 கோடி ரூபாய் சொத்துக்கள் இருப்பதாக பிரமாண பத்திரம் தாக்கல் செய்திருந்தார். தற்போது அவரது சொத்து மதிப்பு 2.29 கோடி ரூபாய் அதிகரித்துள்ளது.