அ .தி.மு.க., தேர்தல் வாக்குறுதி களை, பொதுமக்கள் எளிதில் புரிந்து கொள்ளும் வகையில், பொம்மைகள், கட் - அவுட்டுகளாக வடிவமைத்து, முன்னாள் அமைச்சர் தங்கமணி பிரசாரத்தில் பயன்படுத்தி வருகிறார்.

நாமக்கல் மாவட்டம், குமாரபாளையம் தொகுதியில், அ.தி.மு.க., முன்னாள் அமைச்சர் தங்கமணி, நான்காவது முறையாக போட்டியிடுகிறார். பிரசாரத்தில் புதிய முயற்சியாக, அ.தி.மு.க.,வின் தேர்தல் வாக்குறுதிகளை பொம்மைகளாகவும் கட் - அவுட்டுகளாகவும் செய்து, ஒரு லாரியில் வைத்து மக்கள் பார்க்கும்படி தொகுதியில் வலம்வரச் செய்துள்ளார்.

அதில், அனைவருக்கும் 'அம்மா' வீடு, பொங்கல் தொகுப்புடன் 1,000 ரூபாய் ரொக்கம், கரும்பு, பானை; ஜல்லிக்கட்டு நடத்துவோருக்கு 5 லட்சம் ரூபாய் நிதியுதவி, வீரர் ஒருவர் காளையை அடக்குதல், கைத்தறி நெசவாளர்களுக்கு 450 யூனிட் விலையில்லா மின்சாரம், 100 நாள் வேலை வாய்ப்பு திட்டம் 150 நாட்களாக உயர்வு, கல்விக்கடன் தள்ளுபடி ஆகிய திட்டங்களுக்கான பொம்மைகள் மற்றும் கட் - அவுட்டுகள் இடம் பெற்றுள்ளன.

எம்.ஜி.ஆர்., ஜெயலலிதா, பழனிசாமி ஆகியோரின் முழு உருவ பொம்மைகள், முருகன் பொம்மை ஆகியவையும் இடம்பெற்றுள்ளன.