'மது அருந்துவதை குறைக்க படிப்படியான நடவடிக்கை எடுக்கப்படும்' எனும் வாக்குறுதிக்கும், '717 மதுக்கடைகளை மூட நடவடிக்கை' எனும் செய்திக்கும் உள்ள தொடர்பு பற்றி, சிந்தித்து சிலாகிக்கும் 'அறிவார்ந்த' தமிழக மக்கள், வசீகர தமிழக முதல்வரிடம் கேட்கும் சில கேள்விகள்...

1 எதிர்க்கட்சி தலைவருக்கான அறிக்கையில், 'மதச்சார்பற்ற நிலைப்பாட்டில் த.வெ.க., உறுதியாய் இருக்கிறது' என குறிப்பிட்ட முதல்வரே... உதயநிதியின் 'சனாதன ஒழிப்பு' கருத்தை புதைக்கும் தங்களது எதிர்கருத்தை எப்போது எதிர்பார்க்கலாம்?

2 ஆட்சியில் எந் த குறை சொன்னாலும், 'முந்தைய ஆட்சி செய்து வைத்த அலங்கோலம்தான் காரணம்' என தமிழக முதல்வர்கள் சொல்வது வழக்கம்; நீங்களும் உங்கள் அமைச்சர்களும் இப்படி நா சுழற்ற மாட்டீர்கள் என நம்பலாமா?

3 அறுபது ஆண்டு காலமாக இரு திராவிட கட்சிகளின் நிர்வாகத்திற்கு பழகிய அரசு அதிகாரிகள், உங்களின் நிர்வாக முயற்சிக்கு போதிய ஒத்துழைப்பு வழங்க மறுத்தால், மக்கள் மன்றத்தில் அதை வெளிப்படையாக சொல்வீர்களா?

4 'விசில்' புரட்சி செய்திருக்கும் எளிய மக்கள், 'தலைகவசம் அணியாததற்கு அபராதம் சரி; தரமான சாலை எங்கே' என போக்குவரத்து காவலரிடம் இனி கேட்டால், 'போய் அரசிடம் கேள் ' எனும் அர்த்தமற்ற பதில் வராதுதானே?

5 'பெரும் வருமானம், வசதியான வாழ்க்கை துறந்து உங்களுக்காக வந்திருக்கிறேன்' என பிரசாரத்தில் சொன்ன எங்கள் விஜய், 'அரசு மருத்துவமனையில் சிகிச்சை பெறும் முதல்வர்' எனும் அடையாளம் பெறும் வாய்ப்புண்டா?

6 அதிதீவிர களையெடுப்பு நடத்தி, 'என் நிர்வாகத்தின் கீழ் இயங்கும் தமிழக காவல் துறையில், 'நேர்மையற்றவர்கள்' என யாரும் இல்லை' எனும் உத்தரவாதம் தர, தங்களுக்கு எத்தனை நாள் அவகாசம் தேவைப்படும் முதல்வரே?

7 'என்று தணியும் இந்த சினிமா மோகம்' என்பது எப்போதையும் விட தற்போது தமிழக மக்கள் மனதில் ததும்பி நிற்கும் பெரும் ஏக்கம்; மக்கள் முதல்வராக இம்மோகம் களைய தாங்கள் எடுக்க விருக்கும் நடவடிக்கை என்ன?

7 ½ லஞ்சம் ஒழிக்கப்படும் தே தி?