மதுரை: தென் மாவட்டங்களில் குற்றங்களை தடுக்கவும், குற்றம் நடக்காமல் பாதுகாக்கவும் தொடங்கப்பட்ட 'ஷீல்ட்நெட்' நடவடிக்கையால், ஒரே நாளில் 33 ரவுடிகள், 27 பிடிவாரன்ட் கைதிகள் கைது செய்யப்பட்டுள்ளதாக, தென் மண்டல ஐ.ஜி., விஜயேந்திர பிதாரி தெரிவித்தார்.

அவர் கூறியதாவது:

'ஷீல்ட்நெட்' நடவடிக்கை என்ற பெயரில், 10 மாவட்டங்களில் குற்ற பின்னணி உள்ளவர்கள், சந்தேக நபர்கள், பிடிவாரன்ட் உள்ளவர்கள், வாகன சோதனை, குற்றத்தடுப்பு, தடுப்புக்காவல் சோதனை மேற்கொள்ளப்பட்டன. 24 மணி நேரத்தில்-, 261 குற்ற பின்னணி கொண்டவர்கள் உட்பட 3,295 சந்தேக நபர்களிடம் விசாரிக்கப்பட்டது. 33 ரவுடிகள் கைது செய்யப்பட்டனர்.

பிடிவாரன்ட் பிறப்பிக்கப்பட்ட 27 பேர் கைது செய்யப்பட்டனர்.- 228 பேர் போலீஸ் கண்காணிப்பின் கீழ் கொண்டு வரப்பட்டனர்.

வாகன சோதனையில் பதிவு எண் இல்லாதது, அதிவேகமாக ஓட்டுதல், விபத்தை ஏற்படுத்தும் வகையில் பொருத்தப்பட்ட ஒளிரும் முகப்பு விளக்குகள் போன்ற காரணங்களுக்காக, 552 டூ - வீலர்கள் பறிமுதல் செய்யப்பட்டன.

தொடர்ந்து குற்றம் செய்பவர்களை அடையாளம் காணவும், ஜாமினில் வந்து குற்றங்களில் ஈடுபடுவோரையும் அடையாளம் கண்டு, ஜாமினை ரத்து செய்ய நடவடிக்கை எடுக்கப்பட்டுள்ளது. அனைத்து மாவட்ட போலீசாரின் ஒருங்கிணைப்பே இதற்கு காரணம். இந்நடவடிக்கை தீவிரப்படுத்தப்படும்.

இவ்வாறு அவர் கூறினார்.