சிட்னி: விரைவில் பிரதமர் மோடியை வரவேற்கும் வாய்ப்பு கிடைக்கும் என ஆஸி., பிரதமர் அந்தோனி அல்பானீஸ் தன் மகிழ்ச்சியை வெளிப்படுத்தி உள்ளார்.

பிரதமர் மோடி, விரைவில் அரசு முறை சுற்றுப்பயணமாக ஆஸ்திரேலியா செல்ல இருக்கிறார். இது பற்றிய தகவலை, பிரதமர் அல்பானீஸ், அந்நாட்டு பார்லிமென்டில் அறிவித்தார். அவர் கூறியதாவது:

பிரதமராக இதுவரை நான் இந்தியாவுக்கு மேற்கொண்ட இரண்டு பயணங்களும் எனக்கு கவுரவம் கிடைத்தது. விரைவில் பிரதமர் மோடியை இங்கு வரவேற்கும் வாய்ப்பு எனக்குக் கிடைக்கவிருக்கிறது.

இந்த பாக்கியத்தை இரண்டாவது முறையாக மீண்டும் பெற ஆவலுடன் எதிர்பார்க்கிறேன்.
இந்திய- ஆஸ்திரேலிய சமூகத்தினரால் பிரதமர் மோடியின் பயணம் சிறப்பானதாக அமையும். உலகிலேயே அதிக மக்கள்தொகை கொண்ட நாடு இந்தியா. ஆஸ்திரேலியா- இந்தியா ஆகிய இரு நாடுகளுக்கு இடையே பொருளாதார உறவு மற்றும் வர்த்தக ஒப்பந்தத்தின் மூலம் நமது வர்த்தக உறவு மேம்படுத்தப்பட்டுள்ளது.

கலாசாரம், கல்வி ஆகியவற்றில் நாம் ஒன்றாக இணைந்துள்ளோம். இவ்வாறு அந்தோனி அல்பானீஸ் கூறியுள்ளார். பிரதமர் மோடி வருகை பற்றிய அறிவிப்பை அந்நாட்டு எம்.பி.,க்கள் கைதட்டி வரவேற்றனர்.