ஊட்டி:ஊட்டி தீட்டுக்கல் பகுதியில் கால்நடை பராமரிப்புத்துறை கட்டுப்பாட்டில் மாவட்ட கால்நடை பண்ணை சுமார், 130 ஏக்கரில் செயல்பட்டு வருகிறது. இங்கு உயர் மரபுத்திறன் கொண்ட ஜெர்சி, கலப்பின ஜெர்சி, பிரிசியன் மற்றும் பிரிசியன் கலப்பினம் என மொத்தம், 80-க்கும் மேற்பட்ட பொலி காளைகள் பராமரிக்கப்பட்டு வருகின்றன. இந்த கால்நடை பண்ணையில் பொலி காளைகள் உறைவிந்து உற்பத்தி நிலையம் மற்றும் ஆய்வகம் உள்ளது.



பொலி காளைகளில் இருந்து உறை விந்து உற்பத்தி செய்யப்பட்டு தமிழகத்தின் பல்வேறு பகுதிகளுக்கும் வினியோகம் செய்யப்படுகிறது. மேலும், இங்குள்ள ஆய்வகத்தில் பல்வேறு சோதனைகளும் மேற்கொள்ளப்பட்டு வருகிறது.

இந்த நவீன ஆய்வகம் வாயிலாக உற்பத்தி செய்யப்படும் விந்தணுக்கள், 93 சதவீதம் பெண் கன்றுகள் பிறப்பதை உறுதி செய்கின்றன. இதனால் பால் உற்பத்தியை பெருக்க செயற்கை முறை கருவூட்டலுக்கு இது பெரிதும் உதவுகிறது. கால்நடை பராமரிப்பு மையத்தில் மேற்கொள்ள வேண்டிய சீர்திருத்த நடவடிக்கைகள் குறித்து கால்நடை பராமரிப்புத்துறை அதிகாரிகள் ஆய்வு செய்தனர்.