​ஸ்ரீநகர்: ஜம்மு-காஷ்மீரில் பாதுகாப்புப் படையினர் நடத்திய அதிரடி வேட்டையில், பயங்கரவாதிகளுக்கு உதவியாக செயல்பட்ட 5 பேர் கைது செய்யப்பட்டனர். மேலும், அவர்களின் பதுங்கு குழி கண்டுபிடிக்கப்பட்டு தரைமட்டமாக்கப்பட்டது; பெருமளவிலான ஆயுதங்கள் மற்றும் வெடிபொருட்களும் பறிமுதல் செய்யப்பட்டன.

ஜம்மு-காஷ்மீர் மாநிலம் தெற்கு காஷ்மீரின் குல்காம் மாவட்டத்தில் பயங்கரவாதிகளின் கூட்டாளிகள் நடமாட்டம் இருப்பதாக பாதுகாப்புப் படையினருக்கு ரகசிய தகவல் கிடைத்தது. இதையடுத்து, பாதுகாப்புப் படையினரும் போலீசாரும் இணைந்து கிரேவன் சட்டர் பகுதியில் திடீர் சோதனையில் ஈடுபட்டனர்.

​அப்போது சந்தேகப்படும்படியாக சுற்றிய பயங்கரவாதிகளின் கூட்டாளிகள் 5 பேரை பாதுகாப்புப் படையினர் மடக்கிப் பிடித்தனர். அவர்களிடமிருந்து துப்பாக்கி, கையெறி குண்டுகள் உள்ளிட்ட ஆயுதங்கள் பறிமுதல் செய்யப்பட்டன.

​பதுங்கு குழி தகர்ப்பு:

இதேபோல், வடக்கு காஷ்மீரின் ஹந்த்வாரா பகுதியில் உள்ள நாக்டா நர் வனப்பகுதியில், ராணுவமும் போலீசாரும் இணைந்து தேடுதல் வேட்டையில் ஈடுபட்டனர். அடர்ந்த காட்டின் நடுவே அமைக்கப்பட்டிருந்த பயங்கரவாதிகளின் பழைய பதுங்கு குழி ஒன்றை பாதுகாப்புப் படையினர் கண்டுபிடித்தனர். உடனடியாக அந்த பதுங்கு குழியை வெடிவைத்து தகர்த்து தரைமட்டமாக்கினர்.

​அந்த இடத்தில் பதுக்கி வைக்கப்பட்டிருந்த, ​1 ஏ.கே-47 துப்பாக்கி, ​3 கையெறி குண்டுகள், ​857 ஏ.கே ரக தோட்டாக்கள், ​192 பிகா ரக தோட்டாக்கள், ​8 ஏ.கே மேகசீன்கள், ​1 சைலன்சர், ​83 பிஸ்டல் தோட்டாக்கள் ​மற்றும் பல ஆவணங்கள், பாதுகாப்புப் படையினரால் பறிமுதல் செய்யப்பட்டன.

​காஷ்மீர் பள்ளத்தாக்கில் பயங்கரவாதத்தை வேரறுக்க பாதுகாப்புப் படையினர் தொடர்ந்து தீவிர தேடுதல் வேட்டையில் ஈடுபட்டு வருகின்றனர்.