​புதுடில்லி: ஜனாதிபதியுடனான சந்திப்பு குறித்து எதிர்க்கட்சித் தலைவர் ராகுல் உண்மைக்குப் புறம்பாக, அரசியல் உள்நோக்கத்துடன் பேசி வருவதாக பா.ஜ., கடும் கண்டனம் தெரிவித்துள்ளது.

​தேர்தல் கமிஷனில் முறைகேடுகள் நடப்பதாகவும், ஓட்டு திருட்டு நடைபெறுவதாகவும் குற்றஞ்சாட்டி, காங்கிரஸ் தலைவர் மல்லிகார்ஜுன கார்கே, லோக்சபா எதிர்க்கட்சித் தலைவர் ராகுல், திரிணமுல் காங்., தலைவர் மம்தா பானர்ஜி உள்ளிட்ட 'இண்டி' கூட்டணித் தலைவர்கள், ஜனாதிபதி திரவுபதி முர்முவை நேரில் சந்தித்து மனு அளித்தனர்.

​

ராகுல் கிளப்பிய சர்ச்சை:

இந்தச் சந்திப்பிற்குப் பின் செய்தியாளர்களிடம் பேசிய ராகுல் கூறியதாவது: எங்களின் ஓட்டுத் திருட்டு குற்றச்சாட்டை ஜனாதிபதி மறுக்கவோ, கேள்வி எழுப்பவோ இல்லை. இது எனக்கு பெரும் வியப்பையும், ஆச்சரியத்தையும் தந்தது. எங்களின் புகாரை ஏற்றுக்கொண்ட அவர், அதற்கான ஆதாரங்களை சமர்ப்பிக்குமாறு கேட்டுக் கொண்டார்; அந்த ஆதாரங்களை வழங்க நாங்கள் தயாராக இருக்கிறோம். இவ்வாறு அவர் கூறினார்.

​பா.ஜ., பாய்ச்சல்:

ராகுலின் இந்த பேச்சுக்கு பா.ஜ., செய்தித் தொடர்பாளரும், ராஜ்யசபா எம்.பி.,யுமான சுதான்ஷு திரிவேதி கடும் பதிலடி கொடுத்துள்ளார். அவர் கூறியதாவது: ஜனாதிபதி என்பவர் வெறும் தனிநபர் அல்ல. அவர் நாட்டின் உயரிய அரசமைப்பு அமைப்பு. அவருடனான சந்திப்பில் உண்மையில் என்ன நடந்தது என்பதை ராகுல் திரித்துப் பேசியுள்ளார். அவரது இந்த விளக்கம் முற்றிலும் அரசியல் உள்நோக்கம் கொண்ட பொய்.

​முதலில் மின்னணு ஓட்டுப்பதிவு இயந்திரங்கள், ஹேக் செய்யப்படுவதாகக் காங்கிரஸ் கதையளந்தது. இப்போது வாக்காளர் பட்டியல் தீவிர திருத்தப் பணியில் (எஸ்.ஐ.ஆர்.,) முறைகேடு நடப்பதாகக் கூறுகிறது. இரண்டும் ஒரே நேரத்தில் உண்மையாக இருக்க முடியாது.

​தேர்தல் முடிவுகள் மீது சந்தேகம் இருந்தால், அதை எதிர்த்து முறையிட காங்கிரசுக்கு சட்டப்படி 45 நாட்கள் அவகாசம் உள்ளது. இவர்கள் நீதிமன்றத்திற்குச் சென்று முறையிடுவதே சரி. ஜனாதிபதியுடனான சந்திப்பைத் திரித்துப் பேசுவதும், தலைமைத் தேர்தல் கமிஷனருக்கு எதிராக விஷமப் பிரசாரம் செய்வதும், ராகுல் ஜனநாயகத்திற்கே பெரும் அச்சுறுத்தலாக மாறி வருகிறார் என்பதையே காட்டுகிறது. ​இவ்வாறு அவர் குற்றம்சாட்டினார்.