திருப்பூர்: ஒரு நகரத்தின் வளர்ச்சி என்பது தொழிற்சாலைகளின் எண்ணிக்கையால் மட்டுமே தீர்மானிக்கப்படுவதில்லை. அங்கு உருவாகும் அறிவு, வளர்க்கப்படும் திறமை, புதிய சிந்தனைகளுக்கு அளிக்கப்படும் வாய்ப்பு ஆகியவையும் எதிர்காலத்தைத் தீர்மானிக்கின்றன. உழைப்பால் உயர்ந்த திருப்பூர், கல்வியையும் தொழில்நுட்ப அறிவையும் வளர்ச்சியுடன் இணைத்துக்கொள்ளும்போது, அடுத்தகட்ட முன்னேற்றத்துக்கான வாய்ப்புகள் விரிவடையும்.

சரஸ்வதி பூஜை அறிவைப் போற்றுகிறது. ஆயுத பூஜை உழைப்புக்குத் துணையாக இருக்கும் கருவிகளைப் போற்றுகிறது. அறிவும் உழைப்பும் ஒன்றிணையும்போதுதான் முழுமையான வளர்ச்சி சாத்தியம் என்பதை இந்த இரு விழாக்களும் உணர்த்துகின்றன.

அறிவின் ஆற்றல்

கல்வி என்பது பாடப்புத்தகங்களையும் மதிப்பெண்களையும் தாண்டியது. ஒரு பிரச்னைக்குத் தீர்வு காண்பது, புதிய சூழலுக்கு ஏற்ப மாறிக்கொள்வது, கற்றதைச் செயல்பாட்டில் பயன்படுத்துவது எனப் பல திறன்களை வளர்ப்பதே கல்வியின் நோக்கம். இத்தகைய அறிவு தனிமனித வாழ்க்கையையும் அவர் சார்ந்த தொழிலையும் மேம்படுத்தும்.

திருப்பூரில் அனுபவத்துடன் தொழில்நுட்ப அறிவும் சேர்ந்தால், பணியின் தரத்தை உயர்த்தவும் உற்பத்தியில் ஏற்படும் தவறுகளைக் குறைக்கவும் புதிய வாய்ப்புகளை உருவாக்கவும் முடியும்.

திறனின் தேவை

பின்னலாடைத் துறையில் பணிபுரிபவர்கள் இயந்திர இயக்கம், பராமரிப்பு, தரக்கட்டுப்பாடு ஆகியவற்றில் பயிற்சி பெற்றால் கூடுதல் பொறுப்புகளை ஏற்க முடியும். வடிவமைப்பாளர்கள் கணினிவழி வடிவமைப்பைக் கற்றுக்கொண்டால் தங்கள் படைப்பாற்றலை அடுத்த நிலைக்கு எடுத்துச் செல்லலாம். உற்பத்தித் திட்டமிடல், கணக்கியல், பொருள் மேலாண்மை போன்ற துறைகளிலும் தொழில்நுட்ப அறிவு புதிய வாய்ப்புகளைத் திறக்கும்.

எனவே, கல்வி என்பது வேலைக்கான தகுதியைப் பெறுவதுடன் முடிந்துவிடக் கூடாது. மாறிவரும் தொழில்நுட்பத்துக்கு ஏற்ப தொடர்ந்து கற்றுக்கொள்வதற்கான அடித்தளமாகவும் அது இருக்க வேண்டும்.

இளைஞர் முன்னேற்றம்

பள்ளி, கல்லுாரிப் படிப்பை முடிக்கும் இளைஞர்களுக்குத் தொழில்நுட்பக் கல்வியும் நடைமுறைப் பயிற்சியும் அவசியம். கல்வி நிறுவனங்களும் தொழிற்பயிற்சி நிலையங்களும் நிறுவனங்களுடன் இணைந்து செயல்பட்டால், மாணவர்கள் படிக்கும்போதே தொழில்துறையின் தேவைகளைப் புரிந்துகொள்ள முடியும். இதனால் வேலைக்குத் தயாரான இளைஞர்களை உருவாக்கலாம்.

புதிய பொருட்களை உருவாக்குவது, தொழிலில் உள்ள சிக்கல்களுக்குத் தீர்வு காண்பது, சொந்தமாகத் தொழில் தொடங்குவது என இளைஞர்கள் தங்கள் அறிவைப் பல வழிகளில் பயன்படுத்தலாம். வடிவமைப்பு, கணக்கியல், சந்தைப்படுத்தல், இணையவழி விற்பனை ஆகியவற்றில் கிடைக்கும் பயிற்சியும் தொழில்முனைவுக்கு உதவும்.

புதுமையின் பாதை

துணிக் கழிவுகளை மறுசுழற்சி செய்வது, தண்ணீர் மற்றும் மின்சாரப் பயன்பாட்டைக் குறைப்பது, உற்பத்தியில் வீணாவதைக் கட்டுப்படுத்துவது போன்ற முயற்சிகள் திருப்பூரின் எதிர்கால வளர்ச்சிக்கு முக்கியமானவை. இவற்றில் இளைஞர்களின் அறிவும் புதிய சிந்தனைகளும் பயனளிக்க முடியும்.

ஏற்கெனவே செய்துவரும் பணியைத் தொடர்ந்து செய்வதுடன், அதை இன்னும் சிறப்பாகச் செய்ய முடியுமா என்று சிந்திப்பதே புதுமைக்கு வழிவகுக்கும். இதற்குத் தொழில்நுட்ப அறிவுடன் ஆராயும் மனப்பான்மையும் தேவை.

பெண்களின் வளர்ச்சி

தொழில்நுட்பப் பயிற்சி, கணினி அறிவு, நிர்வாகத் திறன் ஆகியவை பெண்களுக்கு அதிகப் பொறுப்புகளை ஏற்கவும் தலைமைப் பணிகளுக்குச் செல்லவும் வாய்ப்புகளை உருவாக்கும். சொந்தத் தொழில் தொடங்கவும் குடும்பத்தின் பொருளாதாரத்தை மேம்படுத்தவும் கல்வி துணை நிற்கும்.

ஏற்கெனவே தொழிலில் அனுபவம் பெற்றவர்களும் புதிய திறன்களைக் கற்றுக்கொள்ள வாய்ப்புகள் கிடைக்க வேண்டும். வயதோ, கல்வித் தகுதியோ கற்றலுக்கு முடிவல்ல; தொடர்ந்து திறனை மேம்படுத்திக்கொள்வதே இன்றைய தொழில் உலகின் தேவை.

கல்வி நிறுவனங்கள்

தொழில்துறைக்கு என்னென்ன திறன்கள் தேவைப்படுகின்றன என்பதை அறிந்து, அதற்கேற்ப பயிற்சித் திட்டங்களை உருவாக்க வேண்டும். மாணவர்களுக்கு நேரடிப் பயிற்சி, தொழிற்சாலை அனுபவம், புதிய தொழில்நுட்பங்களை அறியும் வாய்ப்பு ஆகியவை வழங்கப்பட வேண்டும்.

தொழிலில் பணிபுரிபவர்களுக்கும் குறுகிய காலப் பயிற்சிகள் ஏற்படுத்தப்படலாம். இத்தகைய முயற்சிகள் தனிநபரின் வளர்ச்சியுடன் நிறுவனங்களின் செயல்திறனையும் உயர்த்தும்.

எதிர்காலத் திருப்பூர்

ஒரு நகரத்தின் வளர்ச்சியை உற்பத்தியால் மட்டுமே அளவிட முடியாது. திறமையான மனிதவளம், புதிய முயற்சிகள், தொழில்நுட்ப மாற்றங்களை ஏற்றுக்கொள்ளும் மனப்பான்மை ஆகியவையும் முக்கியம். இயந்திரங்கள் உற்பத்திக்கு உதவலாம்; அவற்றைச் சிறப்பாக இயக்கவும் குறைகளைச் சரிசெய்யவும் புதிய வழிகளை உருவாக்கவும் மனித அறிவு அவசியம்.

சரஸ்வதி பூஜையில் அறிவைப் போற்றுவதுடன் தொடர்ந்து கற்றுக்கொள்வதற்கான உறுதியையும் ஏற்போம். ஆயுத பூஜையில் கருவிகளை வழிபடுவதுடன் அவற்றைத் திறமையாகவும் பாதுகாப்பாகவும் பயன்படுத்தும் அறிவையும் வளர்ப்போம்.

உழைப்பால் உயர்ந்த திருப்பூர், அறிவையும் திறனையும் அடுத்தகட்ட வளர்ச்சியின் அடித்தளமாக்க வேண்டும். கல்வி வழிகாட்ட, தொழில்நுட்பம் துணை நிற்க, உழைப்பு செயல்படும்போது தனிமனித முன்னேற்றமும் நகரத்தின் வளர்ச்சியும் ஒன்றாகப் பயணிக்கும்.



@block_B@

ஒரு சிக்கலுக்குத் தீர்வு காண்பது, புதிய கருவியைக் கையாள்வது, செலவைக் குறைப்பது, தரத்தை உயர்த்துவது எனப் பலவும் கல்வியின் வெளிப்பாடுகளே. பாட அறிவுடன் நடைமுறைத் திறனும் சேர்ந்தால், மாணவர்கள் வேலை தேடுபவர்களாக மட்டுமின்றி வேலைவாய்ப்பை உருவாக்குபவர்களாகவும் வளர முடியும்.block_B



@block_Y@

கணினிவழி ஆடை வடிவமைப்பு, தானியங்கி இயந்திர இயக்கம், தரக்கட்டுப்பாடு, உற்பத்தித் திட்டமிடல், துணி மறுசுழற்சி, நீர் மற்றும் மின்சாரச் சிக்கனம், இணையவழி விற்பனை ஆகிய துறைகளில் பயிற்சி பெற்ற இளைஞர்கள் திருப்பூரின் தொழில் வளர்ச்சிக்குப் புதிய வலுசேர்க்க முடியும். கல்வி நிறுவனங்களும் தொழில் நிறுவனங்களும் இணைந்து பயிற்சி வழங்கினால், இளைஞர்களின் திறனுக்கும் தொழில்துறையின் தேவைக்கும் இடையிலான இடைவெளியைக் குறைக்கலாம்.block_Y