-நமது டில்லி நிருபர்-

புதுடில்லியில் சுவாமி சின்மயானந்தாவின் பாரம்பரியம் மற்றும் போதனைகளைப் போற்றும் வகையில், சின்மயா அமிர்த மஹோத்சவ் உலகளாவிய மாநாட்டை பிரதமர் மோடி துவங்கி வைத்தார்.

இன்று லட்சக்கணக்கான இளைஞர்கள் இந்தியாவின் கலாசாரத் தூதுவர்களாகச் செயல்பட்டு வருகின்றனர். இளைஞர்கள் இந்திய கலாசாரத்தை அடுத்த தலைமுறைக்குக் கொண்டு சேர்க்கின்றனர்.நாடு புதிய சவால்களை எதிர்கொள்கிறது; இன்றைய சூழலில், சிக்கல்களுக்குத் தீர்வு காண வேண்டிய பொறுப்பு நம் அனைவருக்கும் இருக்கிறது. நம்மைக் பிரிக்க முயலும் சக்திகளுக்கு எதிராக, சமூகத்தை நாம் ஒன்றிணைக்க வேண்டும்.

விழிப்புணர்வு

சுயசார்பின் முக்கியத்துவத்தைப் பற்றி நம் சக குடிமக்களிடையே விழிப்புணர்வை ஏற்படுத்த வேண்டும். 2047ம் ஆண்டிற்குள் வளர்ச்சி அடைந்த இந்தியா என்ற இலக்கை அடைவதற்கான பயணத்தில் அனைவரது பங்களிப்பும் இருக்க வேண்டும்.

இந்த இலக்குகளை அடைய, நாம் இன்னும் தீவிரமாகச் செயல்பட வேண்டும். நமது இலக்குகளும் நோக்கங்களும் ஒன்றே; நாம் அனைவரும் ஒன்றிணைந்து முன்னேறிச் செல்ல வேண்டும். இவ்வாறு பிரதமர் மோடி பேசினார்.