எம்.ஜி.ஆர். நகர்: மினி பஸ்சில் பயணம் செய்த பெண்ணிடம் பாலியல் சீண்டலில் ஈடுபட்ட கொத்தனாரை, சக பயணியர் உதவியுடன் போலீசார் கைது செய்து சிறையில் அடைத்தனர்.

எம்.ஜி.ஆர்.நகர் பகுதியைச் சேர்ந்த 46 வயது பெண், ராமாபுரத்தில் உள்ள அடுக்குமாடி குடியிருப்பில் சமையல் வேலை செய்து வருகிறார். கடந்த 28ம் தேதி இரவு வேலை முடிந்து வீட்டிற்கு செல்வதற்காக, ராமாபுரத்தில் இருந்து மினி பஸ்சில் எம்.ஜி.ஆர்.நகர் நோக்கி சென்றார்.

அப்போது, நெல்லை ஸ்டோர்ஸ் பஸ் நிறுத்தத்தில் ஏறிய 55 வயது நபர், பெண்ணின் அருகில் நின்று பாலியல் சீண்டலில் ஈடுபட்டார். அதிர்ச்சியடைந்த பெண் சத்தம் போட்டதால், சக பயணியர் உதவியுடன் அந்த நபரை பிடித்து, எம்.ஜி.ஆர். நகர் போலீசில் ஒப்படைத்தார்.

விசாரணையில், அவர் எம்.ஜி.ஆர். நகரைச் சேர்ந்த கொத்தனார் செல்வம், 55, என்பது தெரியவந்தது. அவரை கைது செய்த போலீசார், நேற்று முன்தினம் இரவு சிறையில் அடைத்தனர்.