ஓசூர்: தேன்கனிக்கோட்டை அருகே பாறை மீது பைக் மோதியதில், ஒரே குடும்பத்தில் மூன்று பேர் பலியானது, சோகத்தை ஏற்படுத்தியது.

கிருஷ்ணகிரி மாவட்டம் தேன்கனிக்கோட்டையை அடுத்த ஜோகட்டியை சேர்ந்த தொழிலாளி நாகராஜ், 40; இவர் மனைவி ரத்தினம்மா, 35; இவர்களுக்கு நாகேஷ், 18, நவீன், 13 என இரு மகன்கள். நவீன் ஆறாம் வகுப்பு படித்தார்.

மனைவி, மகன் நவீன் ஆகியோருடன் முத்துராயன்தொட்டியிலுள்ள முத்தாப்பா சுவாமி கோவிலுக்கு, ஸ்பிளண்டர் பைக்கில் நாகராஜ் நேற்று சென்றார். காலை, 10:00 மணியளவில், நெல்லுமார் அக்ரஹாரம் அடுத்த அன்னேமார் தொட்டி வனப்பகுதி அருகே சென்றபோது, கட்டுப்பாட்டை இழந்த பைக் சாலையோர பாறையில் மோதியது. இதில் படுகாயமடைந்த மூவரும் பலியாகினர். தளி போலீசார் சடலங்களை மீட்டு, அரசு மருத்துவமனைக்கு அனுப்பி வைத்தனர். விபத்து குறித்து தேன்கனிக்கோட்டை போலீசார் விசாரிக்கின்றனர்.