ராசிபுரம்: ராசிபுரத்தில் மாரியம்மன் கோவில் தீ மிதி விழாவில், குண்டத்தில் தவறி விழுந்த குழந்தைகள் உள்பட ஐந்து பேர் காயமடைந்தனர்.

நாமக்கல் மாவட்டம் ராசிபுரத்தில் உள்ள நித்திய சுமங்கலி மாரியம்மன் கோவில் திருவிழா நடந்து வருகிறது. முக்கிய நிகழ்ச்சியாக நேற்று அதிகாலை குண்டம் இறங்கும் விழா நடந்தது.கடும் குளிரை பொருட்படுத்தாமல் ஆயிரத்துக்கும் மேற்பட்ட ஆண்கள், பெண்கள் மஞ்சள் ஆடையுடன் தீ மிதித்து நேர்த்திக்கடன் செலுத்தினர்.

வெப்படையை சேர்ந்த பாலகிருஷ்ணன், 34, தன்னுடைய இரு குழந்தைகளான மெகந்த் பாலா, 5, நிசாந்த்பாலா, 8, ஆகியோரை துாக்கிக்கொண்டு தீ மிதித்தார். அப்போது கால் இடறி குண்டத்தில் விழுந்ததில் மூவரும் காயமடைந்தனர். ராசிபுரம், கட்டனாச்சம்பட்டி பெரியசாமி, 50; அத்திப்பழகானுார் மாணிக்கம், 40, ஆகியோரும், குண்டத்தில் தவறி விழுந்தனர். ஐந்து பேரும் மருத்துவமனையில் சிகிச்சை பெற்று வருகின்றனர்.