நாமகிரிப்பேட்டை: நாமக்கல் மாவட்டம் நாமகிரிப்பேட்டையை அடுத்த தொ.ஜேடர்பாளையம் மேற்கு தெருவை சேர்ந்தவர் சரவணன் 28; திருமணமாகி மூன்று பெண் குழந்தை உள்ளது. லட்சுமணன் என்பவரிடம், கட்டட வேலை செய்தார்.

அதேபகுதியில் ஞானவேல் என்பவரின் பழைய தொகுப்பு வீட்டை இடித்து, புதிய வீடு கட்டும் பணி நடக்கிறது. அந்த வீட்டை இடிக்கும் பணியில் சரவணன் நேற்று ஈடுபட்டிருந்தார். அப்போது வீட்டு சுவர், கூரை இடிந்து சரவணன் மீது விழுந்தது. அக்கம் பக்கத்தினர் மீட்டு ராசிபுரம் அரசு மருத்துவமனைக்கு கொண்டு சென்றனர். டாக்டர்கள் பரிசோதித்ததில், ஏற்கனவே இறந்து விட்டது தெரிந்தது. போதிய பாதுகாப்பு இல்லாமல், ஆபத்தான பணியை சரவணனுக்கு வழங்கியது, கவனக்குறைவாக இருந்தது தொடர்பாக, கான்ட்ராக்டர் லட்சுமணனை, நாமகிரிப்பேட்டை போலீசார் கைது செய்தனர்.