திருப்பூர்; வரும், 2025, மார்ச், 3 ம் தேதி, பிளஸ் 2 பொதுத்தேர்வு துவங்குகிறது. மொழித்தாள் தேர்வுகளை தொடர்ந்து, முக்கிய தேர்வுகள், மார்ச், 11 முதல், 25 வரை நடக்கிறது. பிப்., மாதம் செய்முறை தேர்வுகள் துவங்க உள்ளது. தேர்வு அறிவிக்கப்பட்ட நிலையில், நடப்பு கல்வியாண்டு பிளஸ் 2 பொதுத்தேர்வு எழுதவுள்ள மாணவ, மாணவியர் விபரங்களை மேல்நிலைப்பள்ளி வாரியாக சேகரிக்கும் பணியில் மாவட்ட கல்வித்துறை சுறுசுறுப்பாக ஈடுபட்டுள்ளது.

முதல் கட்ட கணக்கீட்டின் படி, நம் மாவட்டத்தில், 25 ஆயிரத்து, 469 பேர் நடப்பாண்டு, பிளஸ் 2 தேர்வெழுதுகின்றனர். இதற்காக அவர்களின் விபரங்களை 'எமிஸ்' இணையதளத்தில் பதிவேற்றும் பணி நடந்து வருகிறது. கடந்தாண்டை விட சற்று குறைவான மாணவர்கள் தேர்வெழுத உள்ளனர். இருப்பினும், பொதுத்தேர்வு எழுதும் மாணவர் இறுதி செய்யப்பட்ட பின், தேர்வு மையங்கள் இறுதி செய்யப்படுமென, கல்வித்துறை அதிகாரிகள் தெரிவித்தனர்.