ராமேஸ்வரம்: ராமேஸ்வரம் அருகே பாம்பனில் மது போதையில் டூவீலரில் வந்த இளைஞரிடம் அலைபேசியை பறித்துச் சென்றனர்.

தங்கச்சிமடம் தண்ணீர் ஊற்று கிராமத்தை சேர்ந்தவர் ராயப்பன் 48. மீன்பிடி வலைகளை வடிவமைக்கும் மேஸ்திரியாக உள்ளார். நேற்று முன்தினம் இரவு வேலை முடித்து பாம்பனில் உள்ள டாஸ்மாக் கடையில் மது அருந்திவிட்டு டூவீலரில் அலைபேசியில் பேசியபடி வந்துள்ளார்.

அப்போது ரோட்டோரம் நின்றிருந்த மர்ம நபர் அலைபேசியை பறித்துக் கொண்டு டூவீலரில் தயாராக இருந்த மற்றொரு திருடனுடன் தப்பிச்சென்றார். பாம்பன் போலீசார் வழக்கு பதிந்து திருடர்களை தேடுகின்றனர்.

கோட்டை விடும் போலீசார்

ராமேஸ்வரம் தீவில் பாம்பனில் மட்டுமே டாஸ்மாக் கடை உள்ளதால் இங்கு திருவிழா போல் குடிமகன்கள் கூட்டம் அலைமோதுகிறது. இதனைப் பயன்படுத்தி சமூக விரோதிகள் சிலர் போதை நபர்களிடம் பணம், அலைபேசிகளை பறித்துச் செல்வது வாடிக்கையாகி உள்ளது.

இவர்களை பிடிக்காமல் பாம்பன் போலீசார் கோட்டை விடுவதால் திருடர்கள் தொடர்ந்து பணம், அலைபேசி பறிப்பதில் உற்சாகத்துடன் ஈடுபடுகின்றனர்.