காஞ்சிபுரம்:காஞ்சிபுரம் - உத்திரமேரூர் சாலை, களக்காட்டூர் வழியாக ஆற்பாக்கம், மாகரல், வெங்கச்சேரி, திருப்புலிவனம் உத்திரமேரூர் உள்ளிட்ட பல்வேறு ஊர்களுக்கு செல்லும் டூ - வீலர், கார், வேன், பேருந்து, லாரி என, தினமும் ஆயிரக்கணக்கான வாகனங்கள் சென்று வருகின்றன.

வாகன போக்குரவத்து அதிகம் உள்ள இச்சாலையில், குருவிமலை முதல், களக்காட்டூர் வரை 10க்கும் மேற்பட்ட இடங்களில் சமீபத்தில் பெய்த மழையின் காரணமாக சாலை சேதமடைந்த நிலையில் உள்ளது. இதில், களக்காட்டூர் கால்நடை மருத்துவமனை அருகில் சாலையோரம் பெரிய அளவில் பள்ளம் ஏற்பட்டுள்ளதால், இரவு நேரத்தில் வரும் இருசக்கர வாகன ஓட்டிகள் பள்ளம் இருப்பது தெரியாமல் நிலைதடுமாறி விழுந்து விபத்தில் சிக்குகின்றனர்.

எனவே, சேதமடைந்த சாலையை ‛பேட்ச் ஒர்க்' பணியாக சீரமைக்க நெடுஞ்சாலைத் துறையினர் நடவடிக்கை எடுக்க வேண்டும் என, வாகன ஓட்டிகள் வலியுறுத்தி உள்ளனர்.