வால்பாறை; வால்பாறை நகராட்சி கால்பந்து மைதானத்தை சீரமைக்க வேண்டும் என்று, விளையாட்டு வீரர்கள் கோரிக்கை விடுத்துள்ளனர்.

வால்பாறை நகரின் மத்தியில், நகராட்சி கால்பந்து விளையாட்டு மைதானம் அமைந்துள்ளது. இந்த விளையாட்டு மைதானத்தில் ஆண்டு தோறும், மாநில, மாவட்ட அளவிலான கால்பந்து போட்டிகள் நடக்கிறது. இந்நிலையில், கால்பந்து சங்க நிர்வாகிகளின் கோரிக்கையை ஏற்று, கடந்த இரண்டு ஆண்டுகளுக்கு முன்பு மைதானம் சீரமைக்கப்பட்டது. ஆனால் முழுமையாக சீரமைக்கப்படவில்லை. இதனால் விளையாட்டு வீரர்கள் மைதானத்தை தொடர்ந்து பயன்படுத்த முடியாத நிலை ஏற்பட்டுள்ளது.

இது குறித்து, வால்பாறை கால்பந்து சங்க நிர்வாகிகள் கூறியதாவது: இங்கு, இந்த ஆண்டும், மாவட்ட, மாநில அளவிலான கால்பந்து போட்டி நடக்கிறது. போட்டி துவங்குவதற்கு முன்னதாக நகராட்சி சார்பில், விளையாட்டு மைதானத்தை முழுமையாக சீரமைக்க, அதிகாரிகள் நடவடிக்கை எடுக்க வேண்டும்.

பழுதடைந்த நிலையில் உள்ள கலையரங்கத்தையும், நகராட்சி சார்பில் கட்டித்தர வேண்டும். அங்கு வாகனங்கள் நிறுத்தப்படுவதை தடுக்க வேண்டும். மைதானத்தை சுற்றிலும் தேங்கி கிடக்கும் குப்பைக்கழிவுகளை அகற்ற வேண்டும்.

இவ்வாறு, தெரிவித்தனர்.