ராமேஸ்வரம்:ராமேஸ்வரம்- இலங்கை இடையே கப்பல் போக்குவரத்து துவக்குவதற்காக ராமேஸ்வரத்தில் கட்டுமானப் பணிகள் நடக்க உள்ளது. இதற்காக மீனவர் வீடுகளை அப்புறப்படுத்த தமிழக கடல்சார் வாரியம் நோட்டீஸ் அனுப்பியது.

ராமேஸ்வரம்- இலங்கை இடையே பயணிகள் கப்பல் போக்குவரத்து 1986ல் நிறுத்தப்பட்டது. இந்நிலையில் மீண்டும் கப்பல் போக்குவரத்து துவக்க தமிழக அரசு முடிவு செய்தது. அதன்படி ஏற்கனவே ராமேஸ்வரத்தில் உள்ள துறைமுக அலுவலக கட்டடத்தை அதிகாரிகள் பார்வையிட்டு கடற்கரையில் பாலம் அமைக்க மண் பரிசோதனை நடத்தினர்.

தமிழக கடல்சார் வாரியத்திற்கு சொந்தமான பல ஏக்கர் நிலம் தற்போது மீனவர்களின் மீன்பிடி தளவாட பொருள்களை கையாளும் வீடுகளாகவும், மீன்களை தரம் பிரிக்கும் கம்பெனியாகவும் உள்ளது. இதற்காக கடல்சார் வாரியம் மீனவர்களிடம் நிலவரி வசூலித்தது.

இப்பகுதியில் புதியதாக துறைமுக அலுவலகம், பயணிகள் ஓய்வறை, டிக்கெட் மற்றும் பரிசோதனை மைய கட்டடங்கள் வர உள்ளதால் நேற்று 30க்கும் மேற்பட்ட மீனவர்கள் பயன்படுத்தும் வீடுகள், கம்பெனிகளை அப்புறப்படுத்துமாறு அதிகாரிகள் மீனவர்களுக்கு நோட்டீஸ் அளித்தனர்.