புவவேஸ்வர்: புரோ லீக் ஹாக்கியில் எழுச்சி கண்ட இந்திய பெண்கள் அணி 1-0 என ஜெர்மனியை வீழ்த்தி பதிலடி கொடுத்தது.
சர்வதேச ஹாக்கி கூட்டமைப்பு சார்பில் பெண்களுக்கான புரோ லீக் 6வது சீசன் (2024----25) நடக்கிறது. மொத்தம் 9 அணிகள் பங்கேற்கின்றன. ஒடிசா மாநிலம் புவனேஸ்வரில் நடந்த லீக் போட்டியில் இந்தியா, ஜெர்மனி அணிகள் மீண்டும் மோதின. ஆட்டத்தின் 12வது நிமிடத்தில் இந்தியாவுக்கு கிடைத்த 'பெனால்டி கார்னர்' வாய்ப்பில் தீபிகா ஒரு கோல் அடித்தார். இதற்கு, கடைசி நிமிடம் வரை போராடிய ஜெர்மனி வீராங்கனைகளால் பதிலடி தர முடியவில்லை.


ஆட்டநேர முடிவில் இந்திய அணி 1-0 என்ற கோல் கணக்கில் வெற்றி பெற்றது. தவிர, முதல் போட்டியில் ஜெர்மனியிடம் கண்ட தோல்விக்கு பதிலடி தந்தது. இந்திய அணி, இதுவரை விளையாடிய 6 போட்டியில், 2 வெற்றி, ஒரு 'டிரா', 3 தோல்வி என 7 புள்ளிகளுடன் 7வது இடத்துக்கு முன்னேறியது. அடுத்து இந்திய அணி, நெதர்லாந்தை (பிப். 24, 25) எதிர்கொள்கிறது.