காஞ்சிபுரம்:காஞ்சிபுரத்தில், ஒரு மாதமாக வெயிலின் தாக்கம் நாளுக்கு நாள் அதிகரித்து வருகிறது. வெயிலில் நடமாடுவோர் உடல் சூட்டை தணிக்க தர்பூசணி, கிர்ணி, வெள்ளரிக்காய் உள்ளிட்டவை வாங்கிச் செல்கின்றனர்.

தற்போது நுங்கு சீசன் துவங்கி உள்ளதையொட்டி, சின்ன காஞ்சிபுரம் டோல்கேட், ஓரிக்கை, வந்தவாசி சாலை, வேதாசலம் நகர், ரயில்வே சாலை, ஹாஸ்பிட்டல் சாலை, ஒலிமுகமதுபேட்டை உள்ளிட்ட பகுதியில், நுங்கு விற்பனை செய்யப்படுகிறது.

இதுகுறித்து மஹாஜனம்பாக்கத்தைச் சேர்ந்த வியாபாரி எம்.பிரவீன் கூறியதாவது:

காஞ்சிபுரம் மாவட்டம், பெருநகர், திருவண்ணாமலை மாவட்டம், மாங்கால், மஹாஜனம்பாக்கம், கூழமந்தல், ஆக்கூர், மாத்துார் உள்ளிட்ட கிராமங்களில் உள்ள பனை விவசாயிகளிடம் இருந்து, நுங்கு வாங்கி வந்து விற்பனை செய்கிறோம்.

கடந்த ஆண்டைபோல, நான்கு நுங்கு, 20 ரூபாய்க்கு விற்பனை செய்கிறோம். வெயிலின் தாக்கம் அதிகரித்துள்ளதால், பொதுமக்கள் ஆர்வத்துடன் நுங்கு வாங்கி செல்கின்றனர்.

இவ்வாறு அவர் கூறினார்.