திருப்புவனம்: திருப்புவனம் வட்டாரத்தில் விவசாயத்தை பாழாக்கும் பன்றிகளை விரட்ட பரண் அமைத்து விவசாயிகள் காவல் காத்து வருகின்றனர்.

திருப்புவனம் வட்டாரத்தில் நெல், வாழை, கரும்பு, கத்தரி உள்ளிட்ட பல்வேறு விவசாய பணிகள் நடந்து வருகின்றன. விவசாய நிலங்களை ஒட்டிய கண்மாய் கருவேல மர காடுகளில் பன்றிகள் கூட்டம் கூட்டமாக தங்கி விவசாயத்தை பாழாக்கி வருகின்றன.

பன்றிகளை விரட்ட விவசாயிகள் பரண் அமைத்து இரவு பகலாக காவல் காத்து வருகின்றனர். விவசாயத்தை பாழாக்கும் பன்றிகள் குறித்து வனத்துறை, விவசாயிகள், வருவாய்த்துறை அதிகாரிகள் உள்ளிட்ட குழு ஆய்வு செய்து சென்னை வண்டலுார் வன உயிரின ஆராய்ச்சி கழகத்திற்கு அனுப்பி வைத்தனர்.

ஆராய்ச்சியின் முடிவில் விவசாயத்தை பாழாக்குவது காட்டுப்பன்றிகள் இல்லை என தெரிவித்ததையடுத்து தாலுகா வாரியாக குழுக்கள் அமைத்து பன்றிகளை அப்புறப்படுத்துவது குறித்த ஆலோசனை கூட்டம் நடத்தப்பட்டு வருகிறது.

ஆனால் திருப்புவனம் வட்டடாரத்தில் மட்டும் இதுவரை ஆலோசனை கூட்டம் நடத்தப்படவே இல்லை. தற்போது கோடையில் விவசாயிகள் கத்தரி உள்ளிட்டவைகளை பயிரிட்டுள்ளனர்.

இரவு நேரத்தில் கூட்டம் கூட்டமாக இரை தேடி வரும் பன்றிகள் கத்தரி செடிகளை வேருடன் பிடுங்கி போட்டு விடுகிறது.

பன்றிகளால் விவசாய சாகுபடி பரப்பளவு குறைந்து வரும் நிலையில் பன்றிகள் பற்றிய ஆய்வு முடிவு வந்த பின்னும் இன்னமும் அவற்றை அப்புறப்படுத்த நடவடிக்கை எடுக்காமல் இருப்பது விவசாயிகளிடையே வேதனையை ஏற்படுத்தியுள்ளது.